Nepal lirnghing tuarte tanpuina thawn

Mizoram Presbyterian Kohhran-in Nepal lirnghing tuarte ṭanpuina tur an lakkhawm chu Zirtawpni khan Nepal lamah an thawn.
Synod Office-a Superintendent Dr. Robert S. Halliday sawi danin Aizawl khawpui-a tualchhung kohhrante’n Nepal lirnghing tuarte ṭanpuina tur an thawh tling khawm hi Rs.17,30,480 a ni a. Zirtawpni khan Kathmandu-a Synod Field Secretary Rev. Lalrin-tluanga Ngente hnenah thawn a ni a. Field Secretary hian he pawisa sem a nih dan report hi Synod-ah a rawn thawn leh dawn niin Dr Robert Halliday chuan a sawi a ni.

Thawhlehni leh Ningani inkar chhunga Synod Executive Committee ṭhutkhawmnaa Synod Secretary sawi danin damlo rethei, kangmei leh thlipui leh rial vanga harsatna tawkte hnenah kumin February ni 15 leh May 31 inkar chhung khan tanpuina atan Rs.26,72,000/- Synod-in a sem ral bawk a ni.

Tun ṭum SEC ṭhukhawm hian thu ngaihtuah tur pawimawh tak tak tarlan sa 49 leh thu pawimawh chhawp chhuah dang eng emaw zat a ngaihtuah a. A tam ber hi chu Presbyterian Kohhran inrelbawlna kaihhnawih an ni a. Inneih certificate thu ziah dan kalphung te, Presbytery thar hawngtu ruat dan chungchang te, Hmangaihna In Superintendent term pawh sei thu te, Partnership Committee aṭanga thu lut leh Service Board aṭanga thu lut hrang hrang, posting leh appointment lam khawih thilte chu a langsar an ni. Bangalore-a Mizo Presbyterian Kohhran Biak In sak thu leh sawrkar school-a Yoga zir chungchang te, All India Sunday School Association-a General Secretary hna thawktu tur Mizo Minister ruat thu te, Presbyterian Church of Myanmar leh University of Holy Land nena thawh dun chungchang te chu thu lian zual an ni a, Aizawl West II Presbytery ṭhen chung-chang ngaihtuah a ni bawk.

SEC hmasain Presbytery Moderator kawrfual hman dan inang tlang kaihhruaina siam tura a lo tih chu Officers’ Meeting-in hman nghal theih turin a siam a, Moderator kawrfual hi Presbytery Moderator a nihnaa rawngbawl hna a thawhna hmun apiangah, Presbytery Committee hrang hrang a kaihhruaina tih lohvah chuan a ha ṭhin dawn a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram