Aizawl-a Ropeway hmanga inkalpawh dan tur sawiho

Nimin khan UD & PA Minister Pu Zodintluanga hovin a office-ah Aizawl khawpui chhung leh a chhehvela ropeway hmanga inkalpawh dan tur leh mumal zawka lirthei kalna leh dahna hmun tur sawiho a ni.
Pu Zodintluanga chuan khawpui thang chho mekah lirthei kalphung leh a dahna tur hmunte bakah rope-way hmanga veivahna tur te hi tunhmain ruahmanna awm tawh a nih thu sawiin, rokhawlhna engemaw avangin chhunzawm a ni lova, tuna Urban Mass Transit Company nena a kalphung leh a ruangamte sawihona hun tha tak an nei chu lawmawm a tih thu a sawi a ni.

Planning and Program Implementation Department Secy. chuan he ruahmanna hi a kalphung tur leh a dinhmun zirchianga hma lak a pawimawh thu sawiin, hlawhtlinpui ngei turin bawhzuia, mumal zawka ruahmana siam a la tul dawn avangin hun engemaw chen a la duh dawn a ni, a ti.

Urban Mass Transit Company atangin Leading Edge Adventures Captain Satish Pathania leh Project Manager Ranjani J Dutta-a te an lo kal a, an hmalak thin dan leh an hnathawh dan te an sawifiah a ni.

Cable Car Project hi ataka kalpui theih a nih chuan Chaltlang leh Kulikawn inkarah inkalpawhna siamin, Durtlang Leitan leh Aizawl atangin Sairang leh Lengpui Airport-ah te a kal theih dawn a ni.

Nimin sawihonaah hian a kaihhnawih Dept hrang hrang hotute an tel a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram