Bru lâklêt tum inlan awm lo

Tripura-a Bru Relief Camp 6 aṭanga Mizoram mi laklet turte enfiah hna, thawh 4-na, nimina Asapara Camp-a neihah inlan tumah an awm lo.
Thulakna tarlan danin, laklet turte enfiahnaah hian a ṭan ni niminah inlan tumah awm lo mah se lo ruahman lawk tawh angin enfiah tura kalte’n tun thla ni 16, tunkar Ningani thleng khian an nghak dawn a ni.

Tarlan tawh angin, Bru laklet chungchanga ruahman-na lo siam tawh, Supreme Court pawhin a pawmpui tawh angin enfiah hna hi thawh zui zel a ni dawn a, he hna thawk tura Kolasib District aṭanga kal SDC, Pu Lalhmingliana leh amah tawiawmtute leh Mamit District atanga enfiah hna thawk tura ruat, SDC Pu Lalfakzuala leh amah tawiawmtute Asapara-ah hian an cham mek a ni.

Asapara camp-a chhungkaw 895 awm zingah hian Mizorama lo let duh an awm chuan Tripura sorkar motor ruahmansak hmangin tun thla ni 20 leh 25 inkarah laklet an ni ang. He Camp-a an tih tur zawng zawng an zawh fel hnuah, Relief Camp 6 zinga lian ber, Naisingpara camp-ah Mizorama lo let duhte enfiah hna leh laklet hna chhunzawm leh a ni ang a, chumi hnuah Hazacherra camp-a mite enfiaha, laklet leh tur an ni.

He mi hma lama Kaskau, Khakchangpara leh Hamsapara Camp-a mite enfiahna-ah Mizorama let duh an awm loh avangin tumah laklet an awm lova, camp hrang hrangahte hian an thil phut tihhlawhtlin a nih loh chuan an let duh lo tih Bru-te ziakin anmahni enfiahtu officer-te hnenah an lo thlen a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram