SERCHHIP: Kumin January – June thla chhung khan Vairengte checkgate kaltlangin kuhva rah quintlas 3,022 lakluh a ni a, hetihlai hian kum khat chhunga Mizoramin kuhva man atana sum a hmanral thin chu cheng nuai 6,500 (Vbc 65) vel a tling thin.
Nitin mamawh thlai ah Mizoram ala intodelh lo hle a, State pawn aṭangin thlai chi hrang hrang thahnemtak Mizoramah chawkluh thin a ni a, kumin January atanga June thla thleng khan Alu quintals 43,286, Thlai hring qtls 28,101, Kuhva qtls 3,022, Purun qtls 7,682 bakah Thlai dang engemawzat lakluh a ni a, Vairengte a Trade & Commerce checkgate ah thlai chawkluh te hi chhinchhiah felin, chhiah lak tlingkhawm pawh cheng nuai 21 chuang a tling bawk.
Aizawl New Market a kuhva rah leh panhnah zuartu te hnen atanga ZAWLBUK thudawn danin, kum khatah Mizoramin kuhva rah leh panhnah manah cheng nuai 6,5000 chuang a seng thin a, kuhva rah lak luhte chu phai atangin kar khatah vawi 2 Thawhṭanni leh Ningani-ah a thleng thin a, kuhva rah zuartute chuan phaia mi lei nan hian thla khatah cheng vaibelchhe 4 vel an seng thin a, kum khata senso zawng zawng chu vaibelchhe 48 (nuai 4,800) vel zet a tling thin a ni.
Thudawnna ten an sawi danin, Panhnah hi kar khatah tukri 1,200 vel lak luh thin niin, thla khata sum senso chu cheng vaibelchhe 2 vel niin, kum khatah cheng vbc 24 (nuai 2,400) vel zet a tling bawk a, hengte hi Vairengte checkgate kaltlanga lakluh te an ni a, hetihlai hian Myanmar atanga lak luh a tam bawk avangin Kuhva a Mizoram sum leh pai luangral hi hei aia tam daih pawh hi a ni thei niin thudawnna te chuan an sawi. A tlangpui lakin kum khata panhnah leh kuhva rah mana Mizoramin a senso zawng zawng chu cheng nuai 6,500 (Vbc 65) chuang a tling. Panhnah leh kuhva rah zuara eizawngte hi member 300 chuang an awm a, chhungkaw 2,500 velin eizawn nan an hmang mek ni a hriat a ni.
Hetianga kuhva a Mizoram sum senral a tam tham hle lai hian Mizoram chhunga tharchhuah erawh tihtham ala awmlo a, tun dinhmuna Mizo-rama kuhva tharchuah te hi Bilkhawthlir, Vairengte, Zaw-lnuam leh Zamuang khua a kuhva chingtute tharchhuah a ni.
Zamuang khuaah hian Saikhalha’n kum 1970 khan Kuhva kung 5,000 phunin bul a tan a, Saikhalha hian kumtin a kuhva huan atangin cheng nuai 10 vel a lei chhuak ṭhin a, Mizoram a kuhva chin uar berna ni a ngaih Zamuang khuaah hian Kuhva kung 5,20,000 vel phun tawh a ni.
Zamuang khua hi in 250 niin mihring 1658 an cheng mek a, Kuhva atang hian kumtin vaibelchhe 2 man hu vel an thar chhak thin a, mi pakhatin Rs. 12,000/- vel la lut thin ang an ni.