March thla chhungin Aizawl leh Lengpui inkar lei dawh mek zawh tum

Health Minister Pu Lal Thanzara chuan Aizawl leh Lengpui inkar lei dawh mek pawh March thla chhunga dawh zawh tum a ni a ti.
He thu hi nimina nimin zinga Aizawl Dinthar Veng vengchhung inkalpawhna, ‘Hipheia Road’ a hawnnaah a sawi a, Pu Lal Thanzara chuan Tlawng lei hi Ministry of Road Transport and Highways sum hmanga siam a nih avang erawh chuan duh angin a thawh hmanhmawh theihloh tih a sawi bawk.

Health Minister chuan hmasawnna chu a hmu duh tan chuan Department-tinah, a te leh a lian hmuh tur a awm reng a ni, a ti a. Pu Hipheia’n MP a nih laia Dinthar Veng vengchhung inkalpawhna kawng atana bul a lo tanpui tawh, vengchhung mi MLA Pu T.Sangkunga leh Pu V. Lalro-biaka bakah Aizawl West II-a Congress MLA candidate Dr. Lalmalsawma te ṭhahnem-ngaihna zara kawng ṭha tak siam zawh a hawn theih a ni ta chu lawmawm a tih thu sawiin kawng ṭha nei tura veng mipuite leh Hiphei Road Welfare Committee-ten sawrkar nen thawhho-na ṭha tak an nei chu fakawm a tih thu a sawi bawk. Minister chuan Dinthar veng khawtlang hruaituten hmun an pek theih chuan Health Sub-Centre sawrkarin a pek tur thu kal khawmte hmaah a sawi bawk.

‘Hipheia Road’ hi Pu Hipheia’n MP a nih laia MP Fund a pek hmanga bul tan a ni a. KM chanve a thui niin chhungkaw 180 vel tan chak lakna kawng pawimawh tak a ni. Metre 2.7 a zau leh inches 4-a chhahin kawng hi Cement concrete hmanga siam a ni a. Sik leh sa in her danglam zelin a tihbuailoh nan Iron rod 16 mm hman a ni a, feet 12 dan zelah block siam a ni bawk. He kawng hi mihring 737-in ni 18 chhung an siam a, January ni 21, 2016 khan an zo fel a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram