Immersion heater man vang nia rin naupang thiin hmu

Ramngaihawmi (13), D/o K.Vanlalthara, Sialhau, New Serchhip IOC venga khawsa chu nimin tlai dar 4 vel khan bualinah thia hmuh a ni a, Electric hmanga tuilumna-in a man hlum nia hriat a ni.
Ramngaihawmi (Awmawmi) hi a nau hmeichhe pakhat nen inah awmin bualinah a inbual a, a nau hian a inbual rei deuh nia hriain pawn lam aṭangin au a, a nau hian a koh eih mai theih loh avang hian an kawmthlanga a nu lêng chu a auva, a nu leh a lênna nu chu rang tak tlan chhoin an in chung pa, Pu Saiṭhuama chu an ko nghal a, Pu Saiṭhuama hian kawngka chung aṭangin bualin ah hian a lut ta a ni.

Ramngaihawmi hi bualinah hian a lo tlu a, rang taka Serchhip damdawiin panpui nghal ni mahse chhan theih a ni ta lo a ni.

Mita hmu hmasatute hian Ramngaihawmi hi bualinah hian a lo mu tih sawiin, Electric hmanga tuilumna, Immersion heater chu a âwm chungah an hmu a, a bân ding lam pawh kâng dum a awm tih an sawi a, Electric hian a man hlum nia hriat a ni. Ramngaihawmi nau hian  Induction heater hian hmanni deuh pawhin an unauin a lo man tawh niin a sawi bawk.

Ramngaihawmi hi Pu K. Vanlalthara leh Pi Lalrinliani te fa 4 zing upa ber a ni a, anmahni hi Sialhau khua niin apa hi Sialhau Primary School Headmaster a ni a, he thil thlen lai pawh hian a pa hi Sialhau ah a awm a, a ruang hi nizan khan Sialhau-a phurh chhoh a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram