Nimin chawhnu dar 1 khan Sub-Hqrs. YMA Serchhip Kumpuan Committee te chuan Serchhip District Bawrhsap Dr.Lalrozama, IAS chu a Office-ah hmu-in Lunglei to Aizawl via Serchhip National Highway-54 metalled road rawn thuam ṭha (Re-Surfacing)tu Sunshine Overseas Company te laka an lungawihloh thu an thlen a, hma laksak turin an ngen.
Sub-Hqrs. YMA Serchhip Kumpuan Committee te sawi-danin, kum 2013 chhung khan PWD (National Highway) hnuaiah Sunshine Overseas Company ten Lunglei to Aizawl via Serchhip National Highway-54 metalled road an rawn thuam ṭha (Re-Surfacing) a, Serchhip khawchhung Din-thar Venga Sesah luikam, 80 metres velaa thui leh Chhiah-tlang dai tuikhur bula ruam awm, 10 metres vela thui chu chu nakin lama khawih tura insawiin an kalsan daih mai a, heng kawng te hi tun thlengin an la rawn khawih leh si lova, hemi chungchangah hian hma laksak turin Serchhip DC hi an ngen a, tin, Sunshine Overseas Company ten Lunglei to Aizawl via Serchhip National Highway 54 metalled road an rawn thuam ṭhat (Re-Surfacing) hian a thawktu ten kum 3 chhung repairing hi Warranty a awm tih an sawi a, helai bawr viltu PWD National Highway Engineer te pawhin chu chu vawi tam an sawi a, mahse tun thlengin khawilai mah repair a la awm lova, tunah phei chuan a chhe leh nasa tawh em em mai a, chuvang chuan Warranty a la dam lai ngei hian Repair a nih theihnan hma laksak turin Serchhip DC hi an ngen a ni.
Serchhip District Bawrh-sap chuan Sub-Hqrs. YMA Serchhip Kumpuan Committee te thu thlen chungchangah a theih anga hma a lo lakzui nghal tur thu a sawi a, a chungah Sub-Hqrs. YMA Serchhip Kumpuan Committee te an lawm hle a ni.