Nikum, 2015 aṭanga nimin thleng khan Fire & Emergency Service, Serchhip chu kângmei chhuak vangin ṭum 27 koh an ni tawh a, Fire & Emergency Service-in kohna an dawn zinga a tam zawk hi ram kângah a ni a, in kâng vangin vawi 2 koh an ni a, kangmei chhuaka an kohna tam zawk hi an ṭhelh mit thei a ni.
An ṭhelh mih theih loh te hi inkalpawhna kawng mumal loh vanga kângmei chhuahna hmunah kang ṭhelhna motor te an thlen theih loh ṭhin vang a ni.
Kumin kumthar chhoah pawh hian Fire & Emergency Service hian Serchhip khawpui leh a chhehvelah kangṭhelh hna nasa takin vawi tam tak an thawk leh tawh a, Serchhip District Bawrhsap thupek angin tunlai hian kâng ṭhelhna Motor pakhat chu Serchhip Bazar-ah ni 15 February, 2015 aṭang khan a ding ṭan a, hei hi a chhan chu chhim lama kângmei chhuah thulha rang zawka kâng ṭhelh motor te an thlen theihna tura ruahmanna a ni.
Helipad-a Helicopter lo ṭum leh a thlawh chhuah dawn apiangin emergency leh accident thlen palha hman mai theih turin Kâng ṭhelh motor pakhat dah ziah a ni bawk a ni.