Mizoram sum thawhchhuah (GSDP) a pun zel laiin kan GSDP-a Kuthna-thawktu (Agriculture & Allied Sector) a mite thawhchhuah chu chak tak in a tlahniam char char tih PRISM chuan thuchhuah siamin an sawi.
Thawhṭanni zan khan PRISM chuan |huampui venga Pu C Kaphleia in-ah Mizoram Dinhmun Zirchianna beihpui an buatsaih a, heta thusawitu Prism President Pu Vanlalruata chuan Mizoram sum leh pai dinhmun sawiin “NLUP vanga Kuthnathawktute thawhchhuah pung anga ruling party miṭhenkhatin an sawi ṭhin hi kan zirchian a, kil hrang hrang aṭanga kan chhût hnuin kuthnathawk-tute thawhchhuah/tharchhuah hi a kum telin a tlahniam telh telh zawk a ni” a ti.
Hemi tichiang tura data Prism-in a neihte tarlangin GSDP chhutna atan hlawm (Sector) thum Agriculture & Allied, Industries leh Services a mipui ṭhen an nih ṭhin dante, Mipui tam ber awmna Agriculture & Allied Sector thawh chhuah chu kum 2004-2005 ah 23.5% a ni a, chumi aṭanga kum 5-na, kum 2008-2009 ah 21.74% in a tla hniam a, kum 5 liam leh hnu kum 2013-2014 ah phei chuan 16.15% laiin a tlahniam tawh a ni tia sawiin hei hian Sawrkar Flagship Programme hlawhtling tak anga sawi a ni thin leh kuthnathawktute hmakhua ngai tak anga insawia an thar chhuah pawh a kum tela pung anga an sawifo hi a nihna tak hretu tan chuan awih a harsa hle in kan hria, a ti.
He hun hi Pu RL Liantluanga General Secretary in a kaihruaia, Rev C Sangliana’n hunserh a hmanga, thusawi nghalin “Pathianin hmanrua atan roreltute a hmanga, ringlo mite pawh a tul a tiha ram thatna tur a nih chuan a hmang mai thin” a ti. President thusawi zawh hian kalkhawm mipui ten ram siamthatna atana an ngaih pawimawh te sawiin zawhna te an zawt a, khamlo takin zan dar 11:00-ah kan tin a ni.