Medical leh Economics thlirna aṭanga ṭhalaite leh zu In chungchang zirhona nei

Thawhlehni khan Synod Campus Ministry leh Govt. Hrangbana College Career & Counselling Cell buatsaihin Govt. Hrangbana College Golden Hall-ah Medical leh Economics thlirna aṭanga ṭhalaite leh zu In chungchang zirhona  neih a ni a. Seminar-ah hian Dr. C Lalhrekima, Psychiatrist, Civil Hospital leh Dr. Laldinliana Varte, Asst. Prof., Commerce Deptt., MZU te resource person an ni.
Dr. C Lalhrekima chuan, zirlaite hnenah zu in taksa peng hrang hranga tihchhiat theih dan, thluak atanga ke ler thleng a khawih dan chihrang hrangte a sawi a, zirlaite chu zu in leh in loh thu tlukna chu anmahni thu a ni, a ti.

Dr. Laldinliana Varte chuan, zu in ram economy a nghawng dan a sawi a. Zu aṭanga sum tam tak lakluh a nih laiin, a nghawng avanga sum senso a tam theih zawk zia zirchianna aṭangin a tar-lang a. Kum 2011-a USA Deptt. of Health-in a zir chiannaah, zu vanga senso hi zu vanga lakluh aiin a let 17 in a tam niin a tarlang.

Karnataka State zir chiannaah chuan zu aṭanga sum hmuh cheng 10 zelah zu vangin cheng 16 aia tam an seng tih sawiin, “India zu consumption hi za zela 60 chu local a ni a, IMFL leh Beer litre 10 hralh a nih apiangin local zu litre 12 hralh ang a ni a, Kumtin zu chhe in avanga thi mi 118 vel awm thin ang kan ni,” a ti.

Zu kan tih zalen chuan zu in kan thiam chho mai ang tih chungchang zirchianna a sawiah, USA a prohibition an hlih hnu kum 77-ah chuan Class 12 zirlai za zela 41 te chuan zu an in fo tawh a, za zela 24 te chuan rui hnep khawpin an in fo thin tih hmuhchhuah a nih thu Dr.Laldinliana Varte chuan a sawi bawk.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram