Khawvela Home Furnishing Company lar leh lian ber zing a mi, IKEA chu Mizoram-ah an rawn lut dawn niin sawr-kar thuchhuah chuan a tarlang.
Rua leh mau, changel kawr leh thing tha te hmanga inchhung bungraw chi hrang hrang siamchhuahna aṭanga kum 1-a cheng tluklehdingawn 238 vel hui lut mektu, India ram aṭang ngawt pawha kumtin cheng vaibelchhe 2300 chuang man furniture lei ṭhin tu, IKEA chuan tun hnaiah rua leh mau aṭanga bungraw siam sa lei chu namen lo a tihpun a tum a, tunhma a an tih dan ṭhin, an ram luh tharna a Industry lian pui pui din chu ti tawh lovin, an duh ang siam thei tur nena partnership siam an duh a, Mizoram chhunga chutiang lam hawi Industry din duhte partner atan an duh a, hetianga thawhṭhona ṭha tak nei tur hian Mizoram sawrkar hotu Chief Minister sawmna angin IKEA hotute Mizoram-ah an lokal dawn niin sawrkar thuchhuah chuan a tarlang a ni.
IKEA Project Head, Pu Rajasekhar Warrier-a chu Febuary kar hnihnaah Aizawl-ah lo kalin ni 11 Febuary 2016 hian Mizoram sawrkarin workshop a buatsaihsak ang a, he workshop hi Chief Minister-in a tel pui dawn a, he workshop-ah hian Changel, Rua leh Mau industry din duhte nen an thawh ho dan turte, Mizorama an thawhpuite hnen aṭanga IKEA beisei/phut te, leh Bank dawrna tur leh an product lei sak zar zarna tur atana Buy Back Agree-ment an siam dan tur leh thil ṭul dang te inzirtirna hun, zawhna zawh hun hman a ni ang.
IKEA hian Mizorama an Partner-te hnen aṭang hian an product mamawh tur chi, an duh zat te leh a rate te hre sa vekin an leisak thei dawn a. Mizorama Industry a hlawh-chham fo ṭhin nachhan pakhat, thil siam chhuah hralhna, market-a access nasa taka a tihbo theih avangin Mizoram Econo-my tan hun thar a hawn theih ngei beisei a ni, tih sawrkar thuchhuah chuan a tarlang.