Mizoramah mahni inchhungah hmeichhiate chunga hleilenna a tam

Mizoram-ah mahni inchhung ngeia hmeichhia te chunga hleilenna leh kutthlak (domestic violence) a tam niin All Mizoram Women’s Federation (AMWF) chuan an sawi.
AMWF hian Inrinni khan Aizawl Millennium Centre kawtah Hmeichhe chunga hlei-lenna leh kutthlak duh lohna lantirna leh ti lo tura intiamkam-na hmingziah (signature campaign) an huihawt a. He hunah hian an pawl President Dr. Jane R.Ralte chuan Mizoram dinhmun tarlangin kum 2012-13 khan inchhungkhura hmeichhiate laka hleilenna thubuai 67 a awm thu sawiin, 2013-2014 khan thubuai 55 a awm niin a sawi a. Kum 2014-2015 khan thubuai 109-ah a kai chho niin a sawi. Hetih lai hian pawngsual chung-changah erawh a kum tel in thubuai awm zat a tla hniam niin a sawi a, kum 2012-2013 ah pawng-sual 41 awmin kum 2013-2014 ah thubuai 25 ah a tla hniam a, kum 2014-2015 ah thubuai 18-ah a tla hniam tih sawiin, pawngsual thleng si Police hnena hriattir loh erawh a awm teuh nia an rin thu a sawi a ni.

Mizoram Police CID (Crime Unit) report atanga a lan danin kum 2015 chhung khan Hmeichhe chunga hleilenna thubuai 303 ziah luh a ni a, chung zinga 77 chu pawngsual thubuai a ni a. Hmeichhe zahawmna tihbawrhbanna (Outrage of Modesty) thubuai 80 ziahluh niin mahni pasal te kut tuara thi hmeichhia 11 an awm a. Kumin January thla chhung khan Hmeichhe chunga hleilenna vanga thubuai ziahluh 24 awmin 5 chu pawngsual thubuaia a ni a, pawngsual thubuai ziahluh 5 zinga pali chu kumtlinglo pawngsual thubuai a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram