Zothlifim Logo
Loading ...

Tuichawngchhuah khaw Primary School kan chung-changa Lunglei-a Police-te’n an man MSU hruaitute Inrinni tlaia thu delhkilh awm lova chhuah an nih avangin vawiina Aizawl-a kawngzawh tura ruahman chu ṭhulh a ni.
MSU Assistant General Secretary-in thuchhuah a siamah chuan Chief Minister Pu Lal Thanhawla’n Joint NGO Coordination Committee hotute ngenna ngai pawimawha Lunglei tanina khung MSU hruaitu 9 te thu delhkilh awm lova chhuah an nih theihna’n hma a la niin a tarlang a. Hemi avang hian zirlai hruaitute hi chhuah an ni ta a. Hemi avang hian vawiina MSU leh Aizawl City College Joint Student Union huaihawta kawng zawh tura ruahmanna awm chu ṭhulh leh a nih tak thu a thuchhuah chuan a sawi a. MSU hruaitu chhuah takte hi Aizawl Vanapa Hall kawtah vawiin chawhma dar 11 hian hmuahna hun buatsaih a ni dawn thung.

Zirtawpni-a Lunglei District-a Lungsen RD Block huamchhung a mi Tuichawngchhuah a SSA School choka leh inthiarna a kan avangin Police te chuan he khuaa kal MSU General Headquarters President Pu PC Lalrinhlua leh hruaitu dang 4 bakah MSU Lunglei Regional Headquarters-a Vice President Pu Lalrinngheta Sailo leh hruaitu dang 3-te chu Lunglei bul Sazaikawnah an man a.

Inrinnia MSU thuchhuah sawi danin an hruaitute hi Tuichawngchhuah-ah hian Zirtawpni khan an kal a, A hma-in dan kalha din nia sawi he khua hi an tlawh tawh a, ramdangmite’n dan kalha an din a nih avangin chhuahsan turin an ngen tawh a. Chhuahsan chu sawi loh in sak belh a awm nia an hriat avangin Inrinni khan endik turin an tlawh leh a ni an ti. Hetianga an tlawh hnu hian he khaw Primary School chu a kâng ta a, chumi avang chuan MSU hruaitu mi 6-te hi Police te’n manin Lunglei District Jail-ah an dah ta niin an sawi.

MSU te chuan khaw dintu te hi Bangladesh aṭanga lo lut, ramdangmi Chakma niin an sawi a, Joint NGO Coordination Committee chu hemi chungchangah hian inrawlhin Inrinni tlai khan Chief Minister an hmu a. Chumi hnu lawkah MSU hruaitute hi thu delhkilh awm lovin chhuan an ni ta a ni.