Nu-in nau a pai laia hmeichhia nge a nih mipa tih lo enlawk hi India-ah chuan khap a ni a, mahse nausen hmeichhia tihhlum ṭhin vên nan nausen nihna lo enlawk chu tih ngei ngei tur (Compulsory)-a siam a nih mai theih thu Union Minister Maneka Gandhi chuan a sawi.
Women and Child Development Minister chuan, “Policy thlak hi a ṭha zawk thei a ni. Hmeichhia a rai veleh a nau pai lai chu hmeichhia nge a nih mipa tih register sak a ni ang a. Register a nih tawh chuan nau alo pian hunah pawh a enzui theih tawh dawn a ni,” tiin a sawi a, “He ngaihtuahna hi kan la nei chauh a ni a, sawihona te neih mek niin, thutlukna erawh siam a la ni lo a ni,” tiin Minister chuan All India Regional Editors Conference-ah a sawi a ni.
Minister chuan nausen nihna enlâwk hi khap ni mahse a ruka Ultrasound hmanga lo enlawk chu vên hleih theih a nih si loh avangin naupai lai hmeichhia tihhlum ṭhin venna tura kawng dang zawnna tura he ngaihdan hi lo piang chhuak a nih thu a sawi bawk a ni.
Naupai lai nihna enkawl khapna hi kum 1994 aṭang khan India-ah kalpui ṭan a ni a, mahse tun thlengin India chu Sex ratio-ah a ṭha thei tak tak chuang lova, kum 2011 census-ah khan mipa 1000 awmnaah hmeichhia 914 awm ang a la ni a, Union Minister thusawi hi mi tam tak chuan an duhloh thu an sawi nghal a ni.