School Education Minister Pu H.Rohluna chuan IAS Coaching Centre atana cheibawl mek, Dinthar veng Govt Primary School-I chu nimin zing khan tlawhin hmalak mek dan a enpui a, building awmsa cheiṭhat hna hi zawhfel a nih veleh Coaching class hi ṭan nghal tum a ni.
Aizawl Dinthar venga sawrkar Primary School-I leh II te chu chhun finin, P/S-I building hi IAS Coaching Centre dinna turin sawrkar chuan a pe fel tawh a. Mizoram Youth Commission hmalakna hnuaia Coaching Centre din tur hi India rama ṭha bera ngaih, Alternative Learning System (ALS) hnuaia kalpui tur a ni a, Excel Classes, Delhi nen tang kawpin Staff Selection Commission Exam Coaching Class pawh kalpui tel tum a ni bawk a, zirtirna hi VSAT kaltlangin zirlaiten an dawng dawn a ni.
IAS Coaching hi kum 1 chhung kalpui tur a ni a, Course fee hi mi pakhat tan Rs.80,750/- zel a ni a, he tang hian sawrkar chuan Rs.60,000/- tum sakin a bak Rs.20,750/- chu zirlai tum tur a ni a. Course khatah hian seat 100 awm tura ruahman a ni bawk.
SSC Coaching hi thla 3 atanga thla 4 inkar kalpui tur a ni a, Course fee, mi pakhat tan Rs.12,000/- aṭangin sawrkar chuan Rs.9,000/- a tumpui ang a, a bak Rs.3,000/- chu zirlai tum tur a ni. SSC-ah hian Course khatah seat 200 awm tura ruahman a ni thung.
School Education Minister Pu H.Rohluna hi Parliamentary Secretary Pu Joseph Lalhimpuia’n a tawiawm a, Mizoram Youth Commission Chairman Pu T Sangkunga leh sorkar mipawimawh dangten an lo dawngsawng a ni.