Sawrkarin buhfai manah thlatin cheng vbc. 7–8 vel a hum thei dawn

SERCHHIP: Food, Civil Supplies & Consumer Affairs, Transport leh Tourism Department enkawltu Minister Pu John Rotluangliana chuan VIP quota te, pawl leh mimal hnenah buhfai permit pek ṭhin te tihtawp a nih avang te leh Food Security Act kan hman ṭan dawn avangin sawrkar chuan thlatin cheng vaibel-chhe 7 aṭanga vaibelchhe 8 vel sum kan hum thei dawn a ni, a ti.
He thu hi nimina Kolasib leh Bairabi a tlawhnaa Bairabi Tourist Lodge-a khawtlang leh tlawmngai pawl hruaitute te nen an inkawmhonaah a sawi a, Supply Minister chuan Food Security Act chungchang sawiin, Food Security Act hmang turin Sawrkar chu a inpeihfel tawh a, a tlangzarhna hi February ni 25-ah neih kan beisei a, March thla aṭangin kan hmang ṭan dawn a, Mizoram mihring 7,06,000 vel a huam dawn a ni, a ti a. Food Security Act hi mipui tan malsawmna anih rualin ram tan thil chenfak awm tak a ni a a ti.

Road Safety Week hman-lai mek chungchang pawh sawiin Transport Minister chuan Mizoramah lirthei a tam tawh em avangin lirthei khaltu ten anmahni leh midang himna atan traffic rules an hriatchian leh an ngaihpawimawh a ṭul thu a sawi a, lirthei khalhtute a tam zawk  hi hawihawmna lamah kan tlachham niin a lang fo ṭhin a, motor khalhtu reng reng te hi polite hreh loh ila chutia kan tih chuan midang tan entawntlak kan ni thei a ni, a ti. Lirthei chetsualna tam zawk chu a khalhtu te fimkhur tawk loh vang a ni fo a tiin zu leh motor khalh hi thil inhmeh loh ber nia a hriat thu a sawi bawk.

Hemi hnu hian Transport Minister chuan Bairabi Rel Station a tlawh a, North East Frontier Railway hotuten an hma lak tawh chin te hrilhin March thla chhunga Bairabi Rel Station a bungraw phur rel (broad gauge) tlan luhtir an beisei thu an hrilh a. Passenger train chung-changa Minister zawhna chhangin railway hotute chuan March thlaa bungraw phur rel a tlan hnu leh Commissioner of Railway Safety-in helai hmun a endik hnu chuan passenger train (broad gauge) chu Bairabi-ah March thla tawp lam emaw April thlatir lamah emaw a luh ngei an beisei thu an sawi a, hna hi chhun zan zawma an thawh mek thu Minister hi an hrilh bawk a ni.

Pu John Rotluangliana chuan Bairabi kaia Tlawng lui chunga lei dawh mek a tlawh bawk a, he lei hi an dawh zawh hunah Mamit District leh Kolasib District ten hmasawn-na rahbi thar an kai dawn a, mipui lam pawhin nasa takin an chhawr thei dawn a ni, a ti a. Hnathawktu te chu an hma bak te zawtin he hna zawhfel hi mipui an nghakhleh thu a hrilh a, lei dawhtu ten April thlaah hnazualpui chu zawh an beisei thu Minister an hrilh a ni.

Kolasib-ah hian Legal Metrology hnuaia tuialhthei phurtu tank lorry te endikna hmun tur ‘Calibration Tower for Testing of Tank Lorry’ bunna tur hmun engemaw zat Department in lo thlithlai te chu a hmunah kalin Department officer te nen an enhova, heng hmun an en aṭang hian a hmun rem an la thlang leh dawn a ni.

Minister hi Pu Hrangtawna, Commissioner & Secretary, Tran-sport leh FCS &CA Department; Pu Andrew H. Vanlaldika, Jt. Director, FCS& CA Department leh Jt. Controller, Legal Metrology Department leh Ko-lasib-a Department ṭhenkhat hotulu  ten an ṭawiawm a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram