Tunlai hian Zirtirtu indaihlohna chungchang media ṭhenkhatah tarlan a ni ṭhin a, School Education Department chuan thuchhuah siamin an sawifiah.
Sawifiahna an siamah chuan Mizoram pumah Gov’t Middle School Headmaster neilo 91 lai an awm tih an sawi a, sawrkarin heng hmun ruak hnawhkhah nan hian phalna a pe tawh a, Department-in chak thei ang bera bawhzuiin tunah hian MPSC-ah DPC Meeting nei tura chhawpchhuah mek a ni tawh a, tihfel a nih veleh promotion hmu tharte chu heng hmun ruakah te hian dah tum a ni a, Chu chuan Headmaster neih loh avanga school harsatna tawh mek chu enge maw chen a sutkian a beisei awm tih an sawi.
Govt. High School-ah pawh Headmaster nei lo 38 an awm a, Mathematics/Science subject zirtir thei ( B.Sc) neilo school 9 an awm a, B.Sc 1 chauh nei school 50 lai awm mek zingah Gov’t Thingsai H/S pawh hi tel vein a ziaawm pawl a ngaih theih an ni a. Science leh Mathematics subject la thei zirtirtu indaih lohna hi a chhan pakhat chu tun hma aṭangin Mathematics/Science Teacher bik lakna tur Dan / Recruitment Rules a awm loh vang a ni. Tunah chuan Mathematics/Science teacher lak theihna tur a hranpa liau liau in rules siam a ni ta a. Hei hian Mathematics/Science Teacher indaihlohna pawh nasa takin a phuhruk theih beisei a ni tih an sawi bawk.
Tun dinhmunah chuan School hrang hrangte zirtirtu indaihlohna hi rang taka sutkian mai dan a awm rih lo tih an sawi a, a ṭul ang leh theih ang angin hma lak mek zel a ni tih sawiin, School Education Department changtu Minister leh Parliamentary Secretary te bialahte pawh Headmaster leh Zirtirtu indaihlohna hi a awm a, chuvangin a theih ang anga sawrkar hma lak mek te hi ngaichanga hrethiam tur in School Education Department chuan mipuite a ngen a ni.