Governor Lt. Gen Nirbhay Sharma (Retd) chuan Mizoram kaltlanga ramdang nena insumdawntawnna India Policy kalpui tumah Mizo ṭhalaite an inpeih hman loh a hlauh thu a sawi.
Governor Lt. Gen Nirbhay Sharma leh a nupui Pi Jyotsna Sharma ten nimin khan Kolasib an tlawh a, Kolasib Circuit House-ah Deputy Commissioner Pu H.Lalengmawia leh Head of Department te kawm hmasa-in District chhunga hmalakna hrang hrang te a zawt a. Diakkawn YMA Hall ah ama puala buatsaih, Vantlang inkhawmah a tel leh hnu in Salvation Army enkawl, hnuchham run a tlawh a. Khawchhung a hun an hman zawh hnu hian sawr-kar mi pawimawh te nen Serlui ‘B’ Hydel Project an tlawh a. Serlui ‘B’ tuikhuahah hian Engineer te leh NEEPCO official ten an lo dawngsawng a. Serlui ‘B’ Hydel Project kalpui mek chungchang leh hmalak a nih dan te Power & Electricity Engineer ten an lo hrilhfiah bakah Tuirial Hydel Project a hmalak mek chungchang pawh NEEPCO Official te hnen atanga ngaihthlak a ni.
Kolasib mipui te hmaah thu sawiin Governor chuan tlawmngai pawl, kohhran mi te leh sawrkar thawhhona ṭha tak chu Mizoram chakna hnar a ni a ti a. Neih sum, chibing leh sakhuana avanga inthliarhran-na awm ve lohna hmun a nih piah lamah ziak leh chhiar thiam tamna a nih avangin Mizoram hmabak a en thu a sawi a. Kum 5 dang lo awm turah phei chuan Mizoram hian nasa takin hma a sawn tawh dawn a ni a ti.
Mipui nuai 10 chuang emaw chiah awmna, ṭawng pakhatin hman ṭawmna state chu state tih hmasawn har lo ber nia a hriat thu sawiin Mizoram a mi cheng tlemna chu remchangah sawrkar hnathawk leh hmalatu ten hmang se a sawt hle ang a ti a. Governor chuan, “Rel kawng, KMMTTP kawngpui, National highway tihlen leh Border trade lo puitlingin a rawn ken tur hmasawnna nasa tak lo dawngsawng turin Mizo ṭhalaite an lo inpeih hman lovang tih a hlau hle tih sawiin heng hmalakna te hi kum reilo te chhunga puitling tur a ni a, Mizo ṭhalaite an lo inbuatsaih hmanloh chuan hmasawnna teltu ni lovin hmasawnna thlirtu an ni hlauh thei a ni, a ti.