Electoral Roll felfai zawk neih nan beihpuithlak dawn

Election Commission of India chuan Electoral Roll felfai zawk neih a nih theih nan beihpui, ‘National Electoral Rolls Purification (NERP) 2016’ a buatsaih dawn.
Hemi chungchanga mipuite hriat atana thuchhuah a siama a tarlan dan chuan, ECI chuan Electoral Roll felfai zawk nei tura beihpui thlakna ‘National Electoral Rolls Purification (NERP) 2016’ hi vawiin, March ni 1, 2016 aṭanga neih ṭan turin a duang a, August 31, 2016 thleng a awh dawn a ni.

He NERP-in a tum ber chu January thlaa Electoral Roll tarchhuah takah khan felhlel a awm em tih leh kum tling chin vote nei thei turte an chuang kim em tih enfiah a ni.

He beihpui thlakna neih chhunga hmalakna tura rua-hman dan chuan Electoral Roll-ah vote nei thei kum tling chin, a bikin kum tling thar kum 18-19 ni mekho E/Roll-a chuan kim tir te, hmun khat aia tama Electoral Roll-a chuangte an awmna hmun pangai nilo zawka an chuanna aṭanga paih te, mithi tawhte electoral roll aṭanga an hming paih te, EPIC diklo siam-ṭhat te, Electoral Roll-a thlalak fiah lo thlak te, Electoral Roll-a particulars (hming/pa hming/kum etc.) diklo awm siamṭhat te leh Polling Station dinhmun enfiah te a ni a. NERP 2016-ah hian NGO-te nen ṭanghova hmalak tum a ni a, Political Party aiawhte nen pawh NERP chungchangah hian meeting la neih tur a ni. NERP 2016 neih chhunga BLO-te ṭawiawm turin Political Party tin te chu Polling Station tin atan BLA ruat turin beisei an ni.

He beihpui thlaknaah hian Polling Station tin Electoral Roll chu a mal te te-in chhiarpui (Census, 2011)-a mihring awm zat nen khaikhin a ni ang a, he khaikhinna aṭang hian vote nei thei chin electoral roll-ah thun kim an ni em tih te, Chhiarpui nen khaikhinin Electoral Roll-ah mipa leh hmeichhe zat inthlauhna a danglam viau em tih te leh Electoral Roll hlui nen khaikhinin Electoral Roll thara elector chuang zât chung-changah felhlel a awm em tihte zir chian a, a ṭul anga hmalak dan tur duan a, hmalak zel tur a ni a. NERP 2016 kalpui dan tur chung-chang hi District tin aiawh te nen sawiho ni tawhin, vawiin, March ni 1, 2016 hian District tinah NERP 2016 hmalakna hi ṭan nghal a ni dawn a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram