Art & Culture Department buatsaihin Public Library Day vawi 3-na State Central Library Reading Hall, New Secretariat Complex-ah hman a ni.
He huna khuallian, Art & Culture Minister Pu R.Romawia chuan, khawtlang leh zirna hmasawnna atan lehkhabu ṭha chhiar pawimawhzia hriain Public Library Day kumtina hman a ni leh tlawmngai pawl YMA te’n Public Library awmze nei taka an enkawl ṭhin chu lawmawm a tih thu a sawi a. Raja Ram Mohan Roy Library Foundation (RRRLF) hnuaiah State Central Library leh District Library te tihchang-tlun chhoh zel a nih thu Minister chuan a tarlang bawk.
Public Library Day hi India ram khawtlang nun siamṭhatna atana thawktu (social reformer) Raja Ram Mohan Roy pian-cham May ni 22-ah kum 2015 aṭang khan lo hman tawh ṭhin a ni a, tum ṭumah hian Pathianni a nih vangin nimin khan Public Library Day hi hman a ni ta a ni.
Mizoram State Library hi 1974 ah din a ni a, tun dinhmunah hian lehkhabu 62074 hawh theih niin, Govt. Recognised NGO Libraries 485 a enkawl bawk a ni.
Hetinrual hian Mizoram chhunga Library nei Branch YMA hrang hrangte pawhin Public Library Day hi anmahni pualin an hmang a, New Serchhip Bazar Branch YMA chuan nidanga an tih loh danin an Branch YMA Library-a lehkhabu hawhtute chu theitui leh a hmeh an lo hlui bakah nimin bika lehkhabu hawhtute chu a thlâwnin an hawhtir a ni.