Bawng hmanga sumdawn khapna Central YMA-in an duh lo

Aizawl-ah ‘Bawngsa Ruai’ buatsaih a ni
Union Home Minister Rajnath Singh-a’n Aizawl a rawn thlen ni, nimin khan Central YMA chuan thuchhuah siamin Bawng hmanga sumdawn khapna an duh loh thu an sawi a, Zolife Group pawhin nimin vek khan Vanapa Hall kawtah a thlawna ei theih turin Bawngsa ruai buatsaih a ni bawk.
Central YMA chuan thuchhuah an siamah chuan, “BJP kaihhruai sawrkar laipui, Union Ministry, Environment & Forest and Climate Change Department-in Prevention of Cruelty to Animal Act 1960 behchhana Prevention of Cruelty to Animal (Regulation of Livestock market Rules 2017) dated 23.5.2017 a tihchhuah, Bawngsa ei leh Bawng talh bakah, Bawngsa hmanga sumdawn khapna dân, India ram puma hman tura a tih hian Mizo mipuite min barakhaihin, hnam tenau zawkte palzûtna niin Central YMA chuan a ngai a, Mizo hnam leh ziaranga inzawm tlat, hunpuiah te ruai kan buatsaih ṭhinna kan sa ei tlanglawn, Bawngsa khap a ni ta mai hian kan hnam ziarang leh kan nunphung, ei leh in a khawih danglam dawn avangin he dan hi a ṭul anga ngaihtuah nawn a siamṭha leh turin Central sawrkar hi kan phut tlat a ni,” tiin an tarlang a.

“India ram secular state ropui takah hian sakhaw mal lâk vung duh avanga sakhaw dang rahbeh hi rem kan ti lova, Constitution of India-in zalenna min pek anga kan chênna hmunah hian zalen taka khawsak theih kan duh a, kan ei leh in turah Dân hmanga in khapbeh tumna sawrkar laipuiin a siam ta mai hi Central YMA chuan a pawm thei lova, Mizoram chhungah chuan he dan hi engti zawng mahin hman kan remti lo a ni. Mizo mipuite pawh a ṭul a nih chuan a tawp thlenga kan zalenna humhim tura ṭang ho tlat turin kan inngen a ni,” an ti.

Nimin vek khan India sawrkar-in Bawngsa ei leh talh a khap duh lohna lantirnan Vanapa Hall kawtah ZOlife Group buatsaihin ‘Bawngsa Ruai’ buatsaih a ni a, khawchhe karah mi 1,500 laiin he ruai hi kil a ni.

Bawngsa ruai buatsaih puala inkhawm buatsaih chu Pu Remruata Varte, Zolife Group-in a kaihruai a, bawngsa ruai buatsaih a nih chhan sawiin, “Vawiina bawngsa ruai kan buatsaih hi tute sakhua tihelna emaw runluihna emaw a ni lo va, Mizote nuna sa pawimawh tak, kût ni vâng thlaa kan sa pawimawh tak khapbeh tumna hi kan dodalin kan duh lo a ni tih kan lantir mai a ni,” a ti.

Mafaa Hauhnar pawhin thusawiin, India ram State 29-ah State 24-ah Bawngsa ei khapna dan chi hrang hrangin kalpui mek a nih tawh thu a sawi a. “Tuna hetiang thil kan buatsaih hi hun lo ti pawl an awm a ni mai thei, mahse, tun aṭanga kan dodal hi a ṭul a, sebo hnuah se kawng kan khâr ang tih a hlauhawm a ni. Kan hunpui ber kan kutpui a kan ei ṭhin Bawngsa hetianga khap a ni chho ta hi a pawi kan ti takzet a, an sakhaw rinna va barh luih kan tum lo ang hian anni pawhin an sakhaw rindan min barhluih tum bik lo se kan duh a ni. Kan ei duh zawng ei thei turin dikna kan nei a ni,” a ti.

PC Lalrinhlua, Ex President MSU pawhin thu a sawi a, “India ram hi sakhaw tihbik nei lo ram a ni a, sakhaw pakhat tana ṭha tur bika hmalakna vung taka kal chho hi ṭha kan ti lo va; India Constitution-in zalenna zau tak min pek nekchep tumna lo awm hi kan dodal a, bawngsa ruai hi kan buatsaih ta a ni,” a ti bawk.