Nimin khan Serchhip Bawrhsap Pi Sangchhin Chinzah chuan Serchhip Hmar Venga Sport Complex, UD&PA Department hnuaia NBCC-in an sak mek chu a tlawh a, an hmalakna hrang hrangte enpuiin an hnathawh dan leh an hmathar lakna te a hnena hrilh hre zel turin Contractor te a hrilh.
Cheng vaibelchhe 12 senna tur, he Sport Complex sak mek hi Sub-Hqrs. YMA leh Sub-Hqrs. YMA hnuaia Vigilance & Monitoring Committee ten Bawrhsap an ngenna angin Bawrhsap hian Civil Engineer hruaiin a tlawh a, a sak phunga YMA lamin ngaimawh an neih ang ang te uluk takin an enfiah a ni.
Pi Sangchhin Chinzah chuan approved Design and Drawing aṭanga hnathawh tur âwm ang chi zawng zawngte a nihna tur ang thlapa thawk tur leh hmalakna thar an neih apianga a hnena hrilh hre zel turin Contractor te a hrilh a, Sport Complex ṭha leh rotling a nih ngei theih nan theihtawp chhuah tura ngenin, a ṭul ang zela pui tura a inhuam thu a hrilh a ni.
YMA lam ten phullem phahna tur (field chhuat) hnuaia tui luan bona tur pipe phûm an tum lo nia an rin chungchangah Contractor te hian metre 5 dan zelah pipe hi an phum vek tur thu leh pipe phûm tur pawh an chah mek thu Bawrhsap hi an hrilh a, pipe aṭanga field sira tui luankawra a inchhun luhna tur pawh a hrana an la verh leh vek tur thu an sawifiah a ni.
Pavilion-a plastic Chair an fit pawh a inkar a zim lutuk avanga tihthâwl an duh thu an thlen te pawh siamrem leh vek a nih tur thu Bawrhsap hi an hrilh bawk a, hetihlai hian Contractor ten an bungrua leh hmaraw ṭhenkhatten misual kut a tuar zeuh zeuh ṭhin nia an sawi chungchangah Pi Sangchhin Chinzah hian SP a lo sawipui tur thu hrilhin, chutiang an tawh apiangin rang taka Police hrilh hre ṭhin turin a ngen a ni.
Serchhip Sport Complex hi kum 2011 aṭanga sak ṭan niin, tunah hian hna tam zawk chu thawh zawh tawh a ni a, hnathawktute hi NBCC hnuaia Agni Shanti Buildtech Ltd. niin tunah hian phullem phahna tur field chhuat an thawk mek a, tluang taka hnathawh zel a nih chuan reilotea zawh theih mai beisei a ni tawh a ni.
Football Field bik hi a dung Metres 110 leh avang Metres 74 tura duan niin, a sirah hian Athletics track siamna tur hmunawl zuah a ni a, a sir kual chhuakin mipui thutna tur siam vek a ni bawk.
Pi Sangchhin Chinzah-in he hnathawh mek a tlawh hi Pu K.Saitluanga, IPRO leh Pu Biakthansanga, AE, DRDA bakah Sub-Hqrs. YMA President Pu R.Sanghmingthanga, Secretary Pu Lalrammawia leh Sub-Hqrs. YMA hnuaia Vigilance & Monitoring Committee Chairman Pu Kap-liana Pachuau leh YMA hruaitu dangten an ṭawiawm a ni.