Serchhipa thlai chingtu inzawmkhawm Serchhip Horticulture & Agriculture Cooperative Society ten an thlai chin a thianghlim tawk lova sawi awm zauh ṭhin chu sumdawnna leh eizawnna thila inbeihnaah an ngai.
He thu hi nimina an Society Chairman Pu PC Siamliana hova Lalpuithanga hall, Chhim Venga Assembly neihah resolution siamin an pass a, an member thlai chingtu tute pawhin thianghlim taka thlai enkawl zui zel ni se, thlai hrisel tawk lo leh him tawk lo hralh chhuah loh nise an ti bawk.
He Sssembly-a an thu pass zingah hian, Mat phai Zawlpui a power lût tawh chu ṭangkai zawka hman a nih theih nan hmun hrang hrangah a ban phun thara sem zai a nih theih nan hmlak nise an ti a, kut hnathawktute kaihhnawiha hmasawnna hnathawh an huam chhunga mi te enfiah ve ṭhin nise tih leh Pu Vaivenga leh Pu Rinsanga ram inkarah kea kal kaina lei rintlak dawh thar nise, kum dang ang bawkin member a duh apiang atan loan lak nise tih te a tel a ni.
Mat phaia thlai phurh chhuahna kawng ṭha tak siam a nih theih nana hmalatu Chief Minister, bialtu MLA Pu Lal Thanhawla hnenah leh DRDA Project Director Pu VL Remliana Serchhip hnenah te, Tractor pahnih petu, Horticulture Minister leh TATA Trust hnuaia NEIDA hnenah te lawmthu sawiin, he an lawm thu hi ziaka thawn nise an ti a. Khaihlak awm lova kum 5 chhung ṭangkai taka loan an lak theihna tura guarantor-a ṭansaktu Pu PC |huamluaia hnenah chawimawina thuziak hlanin, ani hian a rintawk avangin Rural Bank Serchhip branch-ah guarantor ngai lova loan an lak remtihsak hial an nih tak avanga an lawmthu te an sawi.
Serchhip District-a Society 108 zinga nung ber pawl Serchhip Horticulture & Agriculture Cooperative Society Sssembly nimina neihah hian District Horticulture Officer Pi Margareth Vanlalzami leh Asst. Registrar Cooperative Society Inspector Tv Lalrinmawia ten chawhnu hun hmanpuiin, thu an sawi a. Chawhnu hun hi Pu H.Dengchhawna Vice Chairman in kaihruaiin, he society ah hian member 200 chuang atangin 140 vel an kal a ni.