Nimin khan Chief Minister Pu Lal Thanhawla hovin Green Mizoram Day 2017 hman dan tur relin, State Level Committee on Green Mizoram chu CMO, Conference Hall ah an ṭhukhawm a, Green Mizoram Day hi June ni 11 ah hman ṭhin nimahse kuminah chuan he ni hi Pathiania a tlak avangin June ni 9-ah Green Mizoram Day hi hman nise an ti.
Meeting-ah hian thuhma sawiin Chief Minister Pu Lal Thanhawla chuan sum, tha leh hun senga kum tak tak kalta aṭanga Green Mizoram Day a thing leh a ṭiak phun te hi an damkhawchhuah theih nan a enkawl zuina lam hi kan ngaihtuah leh ngaihpawimawh a ṭul a, chu mai bakah ṭhangthar te hnenah thingphun pawi-mawh zia te hrilhhriatna leh zirtirna lamah ṭanlak a ngai tih a sawi a. Nungcha hrang hrang biodiversity tih mai Mizoram-in a neih ṭhat thu sawiin, hengte leh thingphun te hi inzawm vek an ni a, biodiversity humhalh turin thingphun leh ramngaw siam a pawimawh a, tuihna kang chat mek siamṭhatna kawng te, sik leh sa inthlak danglam global warming tihziaawm nan te leh leihnuai tui chiah chin water level tihsân nan te thingphun hian awmze thui tak an nei tih a sawi bawk a, Meeting-ah hian Chief Minister chuan tunhnai sawrkar laipuia Forest changtu Union Minister Pu Anil Madhav Dave a boral chu a ui thu sawiin, environment tana thawhhlawk leh hemi chungchang veia hmalakna tha thahnem tak siamtu a nih thu te a sawi a ni.
Meetingah hian Principal Secretary to Chief Minister leh Principal Chief Conservator of Forests Pu Lalram Thanga chuan Green Mizoram Day 2017 hman dan tur ruahmanna duan lawk te a pharh chu sawiho a ni a, Meeting-in a rel dan chuan kumin Green Mizo-ram Day thupui atan ‘Thing phun la, tuihna siam rawh’ tih chu thlan a ni a. Green Mizo-ram Day-a thing phun tur chu a remchang a piang phun lova, a phunna hmun zir a species thlan nise tih leh heng thing ṭiak te hi a upa leh a lian deuh thlan nise tih te, State Level Committee aṭangin media hrang hrangah thuchhuah puan chhuahna neih nise tih te leh Talk Show pawh neih nise tih te chu meeting ah hian rel a ni a. Green Mizoram Day ah hian kangmei laka venna kawnga District tiṭhate hnenah lawm-man hlan an ni dawn bawk a ni.
Green Mizoram Day hman tirh 1999 aṭanga nikum 2016 thlenga Green Mizoram Day a thing tiak phun leh sem tawh chu 36,58,174 a tling tawh a ni.