CM hovin Peace Accord Review Committee thukhawm

Mizoram sawrkarin remna thuthlung (Memorandum of Settlement) ennawnna atana tunhnaia a din thar Peace Accord Review Committee chu Chief Minister Pu Lal Thanhawla, Committee Chairman ni bawk kaihhruaina hnuaiah nimin khan CM Cabinet Room ah an ṭhukhawm.

Meeting ah hian Peace Accord MNF Returnee Association (PAMRA) in sawrkar laipui, Mizoram Sawrkar leh Ex-Gratia chungchanga thu an thlen te chu Committee-in zau leh uluk takin an sawiho a, heng chungchanga chanchin kimchang leh data te chu June thla ral hmain PAMRA in Committee ah thlehlut se, chumi ang chuan heng thil te hi bawhzui nise an ti.

PAMRA hian Peace Accord MNF Returnee harsatna neite tan In sak ṭanpuina (Housing Assistance) rawtna (proposal) chu Mizoram sawrkarin sawrkar laipuia Ministry of Home Affairs ah thlen sak turin an ngen a. Mizoram sawrkar hnenah hian thil 4 a ngen a, chungte chu Peace Accord MNF Returnee te chenna nghet la nei lo te an chenna hmun ṭheuhah inhmun an neih nan hma lak sak tura ngenna te, mi 13 hna la nei lote tan Special Scheme siam sak tura ngenna te; Remna avanga kir boral tawhte chhungkua hmeithai Family Pension chauh laten eizawnna ngelnghet an neih theih nan Compassionate Ground a thun ngenna te leh Pension hnuah an chhungkaw member an thiamna leh an pate sawrkara hnathawh milin One Time Compassionate Ground ah thun tura ngenna te a ni a. Ex-Gratia chungchangah hian rambuai chhunga nunna chan ta te, Remna Thuthlung anga zangnadawmna an dawn chu beitham tiin Sawrkar Laipuiah zangnadawmna an hmuh leh theih nan hma lak sak turin PAMRA chuan Review Committee hi an ngen a ni.

Peace Accord Review Committee-ah hian Home Minister Pu R. Lalzirliana chu Vice Chairman a ni a, Committee Member dangte chu Social Welfare, Horticulture leh LAD enkawltu Minister Pu PC Lalthanliana; Chief Secretary Pu Lalmalsawma leh Pu R. Zamawia te an ni a, Member Secretary chu Pu Lalrinmawia Ralte, MLA niin, Invitees ah Pu MC Vanlalkima leh Pu Lalthenlova leh Special Invitee a Col. Lalrawnliana chu ruat an ni bawk a, nimin meeting ah hian Member-te, Invitee-te leh Speical Invitee te hi an tel vek a ni.