Skip to content
Home » Chanchinthar » Kumina Serchhip District PMEGP target atan MM-ah cheng nuai 153.70

Kumina Serchhip District PMEGP target atan MM-ah cheng nuai 153.70

Nimin khan Serchhip District Consultative Committee (DCC)/ District Level Review Committee (DLRC)/ District Level Security Committee (DLSC) chu an Chairman Pi Sangchhin Chinzah, District Bawrhsap ni bawk hovin a pisa-ah an ṭhukhawm a, kum 2016-2017 chhunga Bank te hna-thawh an thlirletin hmalak dan turte an duang a, kumin PMEGP target atan Margin Money ah cheng nuai 153.70 an pawm.

Pi Sangchhin Chinzah chuan, Bank te tel lovin sawrkarin hmasawnna hna a thawk thei lova, mimal sum-dawng leh thilsiamchhuahna neite pawhin Bank tel lovin hma an la tak tak thei lo. Mi tam takin Bank nihphung leh hnathawh dan an hrethiam lova, an sum puk te rul tha duhlovin harsatna an siam sak thin a, chu chuan hmalam pan zelna kawng a tibuai ṭhin a, Bank te hi hlêp neia sum pûk chhuahtir ṭhin an nihna hrethiam chunga dawr a ṭul a ni, a ti a. Chutihlaiin sawrkarin Bank te chu an hnathawh dan-ah an tlin ngei tur target a siam sak ve bawk a, chung an target te chu bank lam pawhin tlin ngei tumin theihtawp an chhuah ve bawk tur a ni, a ti bawk.

Nimin meeting-a tarlan a nih danin kum kal ta chhung khan PMEGP ah Margin Money cheng nuai 146.61 District-in a neih laiin a taka pekchhuak chu cheng nuai 58.74 chauh a ni a, hetianga a tlâkhniam chhan hi online submission hman thar a nih vang te, Branch ten anmahnia Sanctioning power an neih tak loh vanga hun a duh rei tak vang te, documents submit kim loh vanga hun a duh rei vang te nia sawi a ni a, kum kal mekah hi chuan Margin Money hi 100% achieve ngei tum nise tiin a rel a, kumin PMEGP target atan hian Margin Money-ah cheng nuai 153.70 chu an pawm a ni.

Hei bakah hian kum kal meka DAY-NRLM target an buatsaih loan thar atan cheng nuai 332, renewal-ah cheng nuai 27.50 te, DAY NULM atana target-ah cheng nuai 103 te, PMAY (Urban) atana target duan te, leh Annual Credit Plan atana target cheng nuai 4450 te chu an pawm bawk a ni.

Hengte bakah hian Bank hlatna khuaa Business Correspondent dah belh dan tur te, Chhingchhip Sainik School thara Bank Extension Counter dah thar dan tur te, Finacial Lite-racy Camp hmachhawp neih dan te leh hmalakna tur dang pawi-mawhte sawi a ni a, Stand Up India Scheme hnuaia hmalakna engmah la awm lo chu ṭhalo an tih thu sawiin tun kum kal mekah chuan hmalakna awm ngei se tiin an rel bawk.

Serchhip District SP Pu Lalringdika chuan he hunah hian Bank te himna lama hma-lakna atana thil ṭul nia a hriatte leh hmalak dan turte a sawifiah a, Meeting ah hian Branch hrang hrangte aiawh bakah Lead bank Chief Manager Pu R. Ralkhuma leh NABARD aiawh te leh District Officer pawi-mawh engemawzat an tel a ni.

Serchhip District chhung-ah hian SBI Branch 2, Mizoram Co-Operative apex Bank Branch 1, UBI Branch 1 leh Mizoram Rural Bank Branch 10 an awm a ni.

Leave a Reply

This site uses Akismet to reduce spam. Learn how your comment data is processed.