Er. F.Lalsanglura, Senior Executive Engineer, PHED, Serchhip WATSAN Division chuan Serchhip mipui te hnenah tui an sem chhuahah Water Quality tihṭhat chu an ngaih pawimawh thu leh chumi tur chuan hma an la chho zel tih a sawi.
He thu hi nimina a office-ah MJA, Serchhip District member te nen inhmelhriatna neih pahah an inkawmhonaah a sawi a, Er. F.Lalsanglura chuan tun dinhmunah Serchhip khawpui châwmtu tui pump-na khawl chu a ṭha tawk tih a sawi a, water quality lamah ṭan lak an thu sawiin, Water quality ṭha tak mipui te hnena sem a nih theih nan leh Tuikum tui nu lutuk avanga harsatna sutkian nan a bula kawrte tui pawh lâkfel a ni tawh a, kawrte tui aṭang hian Serchhip mipui te hnena sem tur tui duhkhawp hmuh a nih thu leh hei vang hian tui tihthianghlimna atana chemical hman pawh 50% zetin hman tlêm a nih thu a sawi a, kawrte tui hi Tuikum tui nut chhung zawng chu a rin theih a beisei thu a sawi bawk.
He hunah hian Er. F.Lalsanglura chuan Serchhip chu Mizoram hmun lai li, Mizo hlang chênna leh CM bial a nih avangin hmun danga mite pawhin kawng engkimah hmun dang aia hmasawnna chakna hmun ni turin an beisei tih sawiin, hemi tur hian an Department pawhin an theihtawpin ṭan an la chho mek tih a sawi a, Department-in hma an lâknaah MJA te nen thawhhona ṭha tak an neih a beisei thu sawiin, MJA te chu thawhhopuiah a sawm a ni.
An department hmalakna a tarlan zingah tun hnai thla 2 chhungin Serchhip District chhunga thingtlang khua te chu ODF-ah inpuang felin, Thawhlehni khan District Verification team pawhin endik hna an zofel tawh tih a sawi a, an endikna report hi State Level Committee-a thawn thlak a nih hnuah an duh hun hunah an rawn endik tawh dawn tih a sawi a, Serchhip District chhunga êk in ṭha lo 1346 chu Swachh Bharat Kosh hnuaiah siamṭhat-sak an ni dawn tih a sawi bawk.
Tunah hian Central sawrkarin titura a tih angin National Rural Drinking Water Supply Programme (NRDWP) hnuaia mipuite hnena tui thianghlim an pekna atana an thil siam hrang hrang (intake, reservoir, public point etc) te a hmun ngeia thlalak (Geo-tagging photo upload) an beih chhoh mek thu leh hemi-ah District ṭhenkhat chu an la Nil laiin Serchhip District chu hmahruaitu a ni mek tih a sawi bawk.
He hunah hian Pu C.Lalhminghlua, President, MJA, Serchhip District pawhin thu-sawiin, Journalist te chu mipui leh sawrkar inkara palai hna thawktu an nih angin hemi kawngah hian theihtawp an chhuah ve ṭhin tih a sawi a, sawrkar department-ten sawrkar ruahmanna bawhzuia an hmalakna kawngah MJA chuan an theih chin chinah tha thawh ve an inhuam reng tih sawiin, Serchhipa sawrkar hnathawk lo awm te thawhpui theih loh an nei lo tih a sawi a, hetihlai hian MJA chuan sawrkar Officer te zinga an Department hmalakna media-a puangzar tha duhlo te endan dang an nei tih a sawi bawk.