Lai Autonomous District Council (LADC) Emergency Budget Session nimina neih chhunzawmah, General Discussion hun ṭan a nih aṭanga reiloteah, chhan hrang hrang avanga lungawi lovin Eptu party te chuan House an chhuahsan.
MNF Legislalture Party Secretary, Chanmari bialtu MDC Pu C.Lalsawmzuala chuan hetia Eptu party-te’na lungawi lova House an chhuahsan chhan hi kawhmawh bawl tum hrim hrim vang lam a ni lova, budget mumal nei lova sawrkar kal reng chu ṭha an ti lova, anmahni pawhin Budget Session ko turin an nawr reng a amaherawhchu Council saworkar inrelbawlna, CCB Rules kalh leh kalphung pangngai ang lova ‘Emergency Budget Session’ koh a ni chu Dan kalh tlat a ni a ti.
MDC chuan District Council-ah ṭul dan a zirin Governor hriatpuinaa Emergency Session koh theihna dan a awm a, ‘Emergency Budget Session’ koh theihna dan erawh a awm lova, chutichung chuan ‘Emergency Budget Session’ koh a ni a ti a. Session hi koh a nih tawh chuan dân angin ni 3 hmain general discussion hi neih theih a ni lova, chuti a nih mek laia, niminpiaha Budget Session koh a, a tuk-a sawihona neih leh nghal pawh chu dan kalh tlat a ni a ti bawk.
Chutih rual chuan sawihona hun, First hour chu Zawhna leh Chhanna atana hman tur a nih laia tun ṭum session-a zawhna leh chhânna hun siam a ni lo leh, zawhna siamna tur, Prescribed Form engmah pek leh siam a nilo pawh chu sawrkar inkaih-hruaina dan kalh tlat a ni a ti bawk. Hei bakah hian ram leh sawrkarin a mamawhna dan a zirin thla 4 chhung hman theih tur, ‘Vote on Account’ anga a ruahmanna siam a, chumi hnu a dan pangngai ang a dan bawhchhiatna awm lova Budget Session pangngai koh theih a nih lai leh chuti ang tura thurawn an pek ve reng laia hetianga phuahchawp a, ‘Emergency Budget Session’ koh a ni chu Opposition party te chuan an pawm thei lo a, house ah an ṭhu thei lo a ni a ti.