Tum 12 zet Grand slam champion lo ni tawh Novak Djokovic chu a kiu hliam vangin kuminah a inkhel thei tawh dawn lo.
World No. 1 hlui Djokovic hi July ni 12-a Tomas Berdych nen Wimbledon Quarterfinal an khelh ṭuma a inhliam avangin a khel chhun-zawm thei lova, a hnuah kum khat leh a chanve zet a kiu-ah harsatna a nei tawh tih a sawi a ni.
World No. 4, Djokovic chuan, “Eizawnna aṭanga ngaihtuah chuan he thutlukna siam hi a awlsam lo hle a, mahse a êng zawnga thil thlir hram hram ka tum a ni,” tiin a sawi a, July thla khan Djokovic hian title 68 a lakna atan Eastbourne-ah Auegon Internatinal title a la a, mahse hei hi kumin January thla hnua title a lak lehna hmasa ber a ni.
January thla khan champion ding lai a nihna hmun, Australian Open-ah World No. 117 lakah a tlawm a, June thlaah French Open Quarterfinal-ah Dominic Thiem hneh lovin a tla bawk a ni.
Djokovic chuan facebook-a a page-ah “Kum tam tak lo awm leh turah Professional Tennis la khelh zel ka duh a ni,” tiin a sawi a, “Serbia leh khawvel hmun hrang hranga Doctor ka rawn zawng zawng leh Specialist ka hmuh zawng zawng te chuan ka hliam chu chawlhpui rih turin min ti a ni,” tiin a sawi a, “Hunrei tak infiamna aṭanga chawlh ngai tur hi dan theih a ni si lova, ka dam leh theihna turin tihtur eng pawh ka ti ang,” a ti bawk.
“Ka kiu hi ka inkhelh nasat apiangin a na a, service-ah harsatna min siam reng a, ka inkhelh laia forehand hman a tiharsa bawk,” a ti a, Djokovic hi chawl rei dawn mahse a coach Andre Agassi chuan Djokovic nen hian kum 2018 season-ah pawh an la thawndun zui zel dawn tih a tichiang thung a ni.