Chelsea manager Antoine Conte chuan ‘Mourinho Season’ thleng thei chu pumpelh an tum thu sawiin, Premier League title an kawllai humhim tumin champion an tum dawn tih a sawi.
Jose Mourinho khan kum 2015 khan Chelsea chu league-ah a champion pui a, mahse a lehpek season-ah Chelsea chu 16-naah a awmpui laiin bân a ni ta a nih kha, champion zawh season-a chetṭhat chhun-zawm loh hi Conte hian ‘Mourinho season’ a ti a, Conte chuan, “Kum 2 liam ta khan Chelsea chu 10-na niin season an khâr a, kha thil kha a thleng nawn tawh tur a ni lo,” a ti.
Premier league title la zawn thei hnuhnung ber chu Manchester United niin, 2008-2009 season khan a zawna season 3 chhung champion-in hattrick an siam a ni.
Conte chuan sawi chhunzawmin, “A har dawn tih kan hria, Chelsea hian Mourinho season thleng thei ven hi kan duh chiang a ni,” a ti a, “Champion hnuhnung pahnih (Chelsea leh Leicester) coach te chuan (a season lehah) an hna an chân ve ve a, hemi vên dan tur ṭha ber zawng chhuak tur leh hmang tur hian rim takin kan thawk a ni,” a ti bawk.
Chelsea hian pre-season-ah Singapore-ah Inter Milan chu 2-1-in an hneh lova, Chelsea goal pawh hi Inter Milan player Geoffrey Kondogbia-in an lama a tihluh a ni a, he match-ah hian Chelsea player man to ber Alvaro Morata pawh a vawi khatna atan a start a, mahse a langsar lutuk bik lo a ni.