Mizoram BJP Vigilance Cell-in kum 2015-16 inkara Aizawl Road South Division huam chhunga retaining wall hmun 25 a siamah thil dik lo a awm nia an hriat vanga ACB-a FIR an thehluh chungchangah Mizoram PWD chuan insawifiahna a siam.
PWD chuan ni 3.8.2017 khan Pi Lalrinkimi, Maubawk chuan kum 2015-2016 chhunga Aizawl Road South Division huam chhunga retaining wall siamna hmun leh estimate amount te RTI hmangin zawhna a theh lut a, Aizawl Road South Division chuan August ni 8 khan heng retaining wall siamna hmun 25 te leh hnathawhna atana sum senso zât te tarlangin RTI hmanga zawhna a chhang tawh a, Mizoram BJP Vigilance Cell-ten heng retaining wall te hi hmu lova insawiin FIR an thehlut ta mai chu Mizoram PWD chuan pawi an tih thu an sawi a, heng retaining wall siam te hi a hmunah enho tura Aizawl Road South Division-in an sawmna chu Mizoram BJP Vigilance Cell ten an pawm duh lo nia sawiin, mimal leh pawl, chanchinbumi te, a duh apiangin heng retaining wall te hi a hmunah ngei en theih a ni tih mipuite an hriattir tih sawiin, a document te pawh Aizawl Road South Division Office ah a en theih reng niin an sawi.