Sawrkar laipui, Ministry of Home Affairs Adviser, Mahesh Kumar Singla chuan Tripura-a Bru-te lo let leh huna an awmna tura ruat, khaw ṭhenkhat VC te kawmin a hmunah a enfiah nghal.
Pu Singla hian Tripura-a Bru, Mizoram an lo lêt leh huna an awmna tura ruat khaw 51 aṭangin heng khaw 3 – Tuidam, Rengdil leh Zamuang khuate hi a tlawh a, heng khuaah te hian in sakna tur leh lo neihna tur ram âwl a awm leh awm loh te, Security leh inkalpawhna kawng a ṭhat leh ṭhat lo te a enfiah a ni. Hei bakah hian Saikhawthlir-a 4th IR BOP leh Rengdil khuaa 4th IR Battalion Headquarter hmun tur te a en nghal bawk a ni.
Pu Singla hi Mamit DC Pi Lalbiaksangi leh mi pawimawh dangten an ṭawiawm a, Ministry of Home Affairs aiawh hian Kolasib District-a Bru lakluh dan chungchang ngaihtuahin Inrinni khan DC Conference Hall, Kolasib-ah District official te leh Home Department aiawhte an ṭhukhawm a ni.
Kolasib Deputy Commissioner Dr.Arun T., kaihhruai ṭhutkhawmah hianMHA Adviser, Pu Mahesh Singla chuan Mizorama Bru te hruai kir leh na tur atan sum leh tha tam tak sen a nih tawh avangin sawrkar laipui chuan tun ṭum Bru hruaikirna tura hmalakna hi a hlawhtlin ngei theih nan uluk zawka ruahman a ni a ti a, Kolasib District Official te leh VC te ṭanrualna chu lawmawm a tih thu a sawi bawk.
November, 2016 thlenga Kolasib District-a Bru kir tur chhinchhiah zat hi chhungkaw 824 niin, khaw 10-a dah turin ruahmanna siam a ni.