Zothlifim Logo
Loading ...

Mizoram sawrkar leh Lalhmingthanga Sanate kaihhruai HPC (D) phel leh lam aiawhte chu tun thla chhung hian inremna atana inbe turin ruahmanna siam a ni.

Home department hotute sawi danin H.Zosangbera kaihhruai HPC (D) nena inbiakna kal mekah HPC (D) phel leh lam Lalhmingthanga Sanate kaihhruai lam nena inbiakna neih a, inremna tluantling siam duhna a awm a, chumi avang chuan Lalhmingthanga Sanate kaihhruai lam hruaitute nen hian thui tak an indawr a, tunah hian Aizawla inbiakna dawhkan kil tur ruahmanna siam a ni ta a, August thla chhung ngei hian inbiak tum a ni a. A kal tluan chuan H.Zosangbera kaihhruai lam nena inbiakna kal mek pawh thla leh September khi chuan chhunzawm hman tawh ngei beisei a nih thu dawn a ni.

Home department hotute chuan September thla a inbiakna chhunzawm a nih leh chuan hei hi official level-a inbiakna hnuhnung ber a nih an rin tawh thu an sawi a. Inbiakna hi an hrual mum thawkhat tawh avangin political level-a inbiakna hi chhunzawm a nih tawh rin a ni a. Sinlung Hills Development Council chungchangah phei chuan thil thui tak kalpui a ni tawh a. Zirtawpni-a Cabinet thukhawm pawhin Election to Sinlung Hills Development Council Rules, 2017 chu a lo pawmpui tawh a ni.

HPC (D) hi kum 1994 a ding a ni a, hemi kum July thla a khatihlaia rammu HPC te leh sorkarin inremna an siam pawm lova rammu lehin Autonomous District Council an ngiat zui a. Tharum thawhna leh dan bawhchhiatna tam tak an khawih zui a. A tira dintu chu Lalhmingthanga Sanate hi a ni chungin Kuki hel pawlte nena inthuruala sorkar nena inkaihhai puan chungchangah an chhungkua-ah inhriatthiam lohna a awm a.

An Army Chief invuah Lalropuia Famhoite leh HPC (D) mi tam zawkte chuan Lalhmingthanga Sanate hi banin an phel ta a, a tam zawk lam hi Manipur-ah inkhuar zuiin Lalhmingthanga Sanate lam hi Assam a Hmarkhawlian lamah an awm a. Manipur lama inkulhte hian H. Zosangbera chu Chairman-ah an thlang a ni.