Nimin chawhnu khan MZP Hqrs Serchhipten zirlaite an kal zelna kawng inkawhhmuhna hun, Career Awarness Campaign Serchhip Auditorium-ah an hmang.
He hun MZP Hqrs, Serchhip Vice President H.Lallawmkima kaihhruaiah hian khuallianah Northeast Consultancy Services (NECS) leh Aizawl Football Club neitu Pu Robert Romawia Royte hman a ni a, thu sawiin Pu Romawia chuan hlawhtlinna chu finna leh thiamnaah a innghat a, chumi tur chuan thawhrim pawh a ngai tel a ni a ti a. Zirlai kalkhawmte chu smart world-ah hian mi smart, mi thiam loh thiam nih tum tur te, ruihtheih thila fihlima nu leh pa thu awih tura fuihin, he hun hman hian Serchhip District chu mithiam tamna hmunah a hlankai ngei a beisei thu a sawi a. ‘Tum hniam lutuk chu pawi khawihna tling’ a ni tih India President hlui Pu Abdul Kalam-a sawi sawi chhawngin, thil a êng zawnga thlir mi nih tum tlat tur a ni a ti bawk.
He huna khualzahawm Pu PC Vanlalluna, RMSA Dy DPC Serchhip pawhin thu sawiin nakina din chhuah nan tuna hrehawm tawrh peih a ngai a ni tiin, Chakma te Mizo laka an zâm loh chhan chu thiamnaa an chungnun zawk vang a ni a ti.
Serchhipa zirlai te Career Awareness Campaign-ah hian Pu Vabeimozachhi Chozah MCS ASO & SDC-1 Serchhip-in zirtirna a pe a, MZP Gen. Hqrs President Lalsangzuala Ngente leh MSU Gen.Hqrs President RB Lalmalsawma leh MZP Serchhip Hqrs President T.Biakchamliana te pawhin thu an sawi a ni.
He hun hman hi a bul ṭanna niin Serchhip District-a MZP Sub Hqrs 7 leh Branch 11-ah nei leh tura ruahman a ni a, nimina he hun hmannaah hian Serchhipa High School leh Higher Secondary School zirlai ṭhahnem tak leh VC, Political Party leh MJA Serchhip hruai-tute an tel a, tun hnaia State Teacher Award dawngtu Pi K.Lalramchhani, Headmistress Govt High School, Chhiahtlang chu chawimawina hlan a ni a, HSLC 2016 topper Laldintluanga pawh Pu Romawia hian Aizawl FC Jersey a pe bawk a ni.