August ni 9 (Nilaini) khan Lunglei District chhunga awm, Dengsur khaw playground chhung-ah leitlahniam a rawn awm a, he lei tlahniam hi circle anga awmin, harsatna lian tham lutuk erawh a thlen hriat ala ni rihlo.
Dengsur Branch YMA hruaitute hnen atanga thudawn danin, an khaw field chhunga leitlahniam hi nilaini, August ni 9 chawhnu lam khan naupangho inkhelh laiin field chhuat chu feet 12-15 vel a zauin circle anga awmin a tlahniam a, a tlakhniamna hi feet 2 vel a thuk chauh ni mahse, mau tlawn a hawlh chuan feet 11 vel pawh a vih tlum vek theih a ni.
Dengsur Branch YMA hruaitute chuan an khaw field, tun a lei tlak hniamna hmun chu a tir atangin hmun rem tha tak a ni lo a, field tur atana cheibawl/siamrual chawp a nih thu leh ruam hnawh a nih thu an sawi a, he ruam hi kawrte hnar a nih bawk avangin, tunhnai ah circle anga awmin, a tlahniam ta ni a ngaihna te pawh a awm. Field lai a circle anga awm a lei tlahniam hi a tirah chuan feet 2 bial emaw chauh a ni a, zawi zawi in a huamchin a lian zel a, tunah chuan feet 12-15 a zau a nih tawh thu thudawnna Dengsur Branch YMA hruaitute chuan an sawi.
Dengsur field a leitlahniam hi he thu ziahlai thleng hi chuan a hmunah mithiam ten an la enfiah lo a, an khawtlang hruaitute chuan a hmun ngei ah mithiam ten enfiahin, thil awmdan dik tak hriat theih nise an duh hle tih an sawi.