MPCC President leh Chief Minister ni bawk Pu Lal Thanhawla’n Lottery-a sum hmanna dik lo a awm nia MNF Party-in a sawi chu CBI chhuitir a ni dawn tih nimina Congress Bhavan inkhawmah a sawi.
Pu Lal Thanhawla chuan Lottery chungchangah sawrkar chuan thil dik lo a awm a hre lova, heti chung hian MNF-in an ngen angin CBI-in a chhui theih nan hma a lakpui tih a sawi a, tunah hian Lottery Agent pahnih Court-a an inkhin avangin CBI ko lut tura an hmalakna chu ala hlawhtling thei rih lo a, thubuai hi chinfel a nih veleh chhui zui tlaka CBI-in a ngai a nih chuan koh luh nghal a ni ang a ti.
Chief Minister chuan M/s Mizo Carbon Product chung-changah amah leh minister pathumte Court-a hek an nihna chu Court in a hnawl tih a sawi a, hemi chungchang ah hian an inhnamhnawih lo tih mipuiten hria se a duh tih a sawi bawk.
Chief Minister chuan Commerce & industry department hmalaknain Thenzawl ah, puantah tih changtlunna turin Handlooom Industry hmun ropui tak, vaibelchhe tel senna tur sa turin ruahmanna siam mek a ni a ti bawk.
Pu Lal Thanhawla chuan Parliamentary Secretary ruatna titawp tura PRISM-in an ngen chungchangah Supreme Court thuchhuak angin, a chhui chiangtu tur mithiam ruat an ni dawn a, an thurawn a zira hma-lak a nih tur thu a sawi bawk.
Amah pui tura Cabinet Minister zinga mi Pu Lal Thanzara ruat a nih danah thil felhlel awm nia PRISM-in an sawi chu thil an hriatchian loh vang nia sawiin, Chief Minister hian amah pui turin a duh duh a ruat thei niin a sawi.
Chief Minister chuan, eirukna lakah amah chu a fihlim fai vek avangin a kaihhruai sawrkar chuan eirukna a do ngam niin a sawi a bawk a, NLUP-a Sangha Supply a nih dana thil dik lo awm nia sawi pawh mi tam tak mak tih hial khawpin ACB chhuitir a ni tih sawiin, Mizo zingah Corruption chu sum eirûkna chauh emaw ti an awm chu a dik ziktluak lova, hun eirukte, mahni hna-a inthlahdahte pawh eirukna vek a ni tih hriat a ngai a, MLA leh Minister zinga an thuneihna hmang suala sum siam nana hmang pawh eirukna dik tak a ni tih hriat a ngai a ni, a ti.