Govt. Modern MS hmunah Volleyball Indoor Stadium dah tumin hma la

Chhim Venga Govt Modern Middle School rauhsan tak hmunah Volleyball Indoor Stadium dah a nih theih nan hma lak mek a ni tih Serchhip Block Congress President Pu PC Vanlalsawma chuan a sawi.

He thu hi Inrinnia Ser-chhip District Volleyball Association (SDVA)-in Serchhip District Volleyball League khârna hun an buatsaih a hmanpuinaah a sawi a, Pu Sawma chuan Sportsman spirit chu ruihtheihthil leh nun ṭha lo laka inthiarfihlimna tur a nih avang-in khawi Biak in leh khawi hmun-ah pawh nunpui tlâk, ṭhalai hma-sawnna thlentu tur a nih avang-in Serchhipah pawh infiamna lama hma kan sawn theih nan Sports Complex Hmar Venga siam mek te, Serchhip indoor stadium (town hall ṭhin)-ah Gym te, silai kahna leh Badminton khelhna te dah a ni a, heng bakah hian New Serchhip-ah Badminton khelhna bakah Boxing hall te pawh siam a ni tawh a ti a, SDVA ṭanpuina Rs.10,000/- a pe nghal a ni..

Modern M/S hmuna indoor Stadium dah tur hian Serchhip District Sports Committee chuan Chief Minister hnenah an lo thlen tawh a, SDVA te pawhin a hlawhtlin nan hmalak an inhuam thu an sawi a, hei bakah hian a veng neitu, Serchhip-III NGO Coordination Committee te pawhin hemi bawhzui hian CM bakah Serchhip District Education Officer hnenah an lo thlen tawh bawk a ni.

SDVA league kharna inkhawm hi Pu K.Tlangthan-mawia SDVA President chuan a kaihruai a, Mizoram Volleyball Association Executive Member Pu B.Lalchhanhima, JE P&E Deptt. chu khuahzah-awm a ni a, match hnuhnung berah Champion ta, Thentlang G&SA chuan 3-1 (25-21, 25-21, 16-25, 25-16)-in Serchhip Vengchung Volleyball Club an hneh a, SDVA Vice President Pu VL Hruaitluanga chuan Technical Report a pe a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram