Nimin khan Mara Autonomous District Council (MADC)-a Executive Member (EM) thar 3 leh Council Member atana ruat thar mi 3-te MADC Forest Hall-ah rinawm-na thu tiamtira lakluh an ni.
‘Ruat Seat’ luah turin Pu Pasa T.Azyu, Siaha Vaihpi; Pi Ngunsuii, College Veng leh Pi A. Merry, Siaha Vaihpi te chu MADC Court President & Recorder, Pu Jeff M.Sanga’n rinawmna thu tiamtirin a la lut a.
Executive Member atana CEM-in a ruat, tun hnaia Governor-in a lo pawmpui tak – Pu V.Vanhupa, Siaha North-II bialtu, Pu L.Prisilla, Zyhno bialtu leh Pu Beirahmo Syhly, Laty bialtu te chu Siaha DC Harleen Kaur-i’n rinawmna thu tiamtirin lalut ve thung a ni.
Lakluh inkhawmah hian CEM Pu N.Zakhai, CEM chuan lawmpuina thu a sawi rualin EM pathumte hna chanpual tur hi a puang nghal a. Pu V. Vanhupa’n Land & Revenue Dept., Cooperation leh Law & Judicial changin Pu L.Prisilla-a’n Soil & Water Conservation, Social Welfare leh Parliamentary Affairs te a chang a. Pu Beirahmo Syhly chuan Sports & Youth Services, AH & Vety leh Protocol te a chang a ni.
Heti hian MADC-ah hian EM 9 an awm ta a, CCB Rules-ah EM 8 awm tura tih chu MADC Fur thutkhawmah khan pakhat siam belh a nih theih nan Dan awmsa tihdanglamna tur Bill pass a ni a, EM 9 an awm ta a ni.