Mizorama Medical College changtlung tak Mizoram Institute of Medical Education & Research(MIMER) dinna kawnga hmalak zelna leh tun thlenga hmalak tawhnate chu H&FW Minister Pu Lal Than-zara hovin ama pisaah an sawiho.
Sawihonaah hian Christian Medical College(CMC), Ludhiana Director Dr. Abraham G.Thomas, Principal Adviser to Chief Minister Pu R.Lalrinawma, H&FW Commissioner & Secretary Pu Lalrinliana Fanai leh H&FW official te an tel a ni.
Health Minister Pu Lal Thanzara chuan Dr.Thomas’n Department sawmna ngai pawimawha a hun hlu tak senga MIMER dinhmun enpui turin leh hemi kawnga thurawn pe tura Mizoram a lo zin chu lawmthu a hrilh a, medical college dinna kawngah theihtawp chhuahpui turin a sawm a, Minister chuan a hma thei ang berah MIMER ṭan a nih theih nana thil tih ṭul pawimawh hmasa leh hmachhawpte bul ṭanna turah CMC Director chuan hma rawn lakpui a, sawrkar thurawn pe zel turin a sawm a ni.
Dr.Abraham G.Thomas chuan MIMER chungchanga sorkarin hma a lo lak tawhnate chu ṭha tawk viaua a hmuh thu leh medical college din chu thil hautak nimahse Mizoram ang state mahnia medical college la nei lo tan chuan thil ṭul leh pawimawh tak a ni, a ti a. Medical Council of India (MCI) pawhin medical college thar dinna tur chu a duh ulukin a hnathawh pawh enfiahna (inspection) ṭum 5-6 lai an neih ṭhin thu a sawi a, Dr.Thomas chuan chuvangin a tirah inspection engemawa tlâk palh a nih pawhin, chung chu siamṭha turin tha thlah lova theihtawp chhuah zel turin Health Department hotute a chah a, MIMER din hunah pawh a bul ṭan kum khatnaah Anatomy, Physiology leh Biochemistry subject zirtir turin Christian Medical College, Ludhiana aṭangin an rawn tirh thei thu Minister a hrilh bawk.
Medical college dinna kawngah Mizoram sawrkarin hma a lak meknaah mithiam tawnhriat nei tawhte pawh a rawn zel a, MCI aṭangin inspection vawi khat an rawn nei tawh a, kumin kum tawp lamah MCI Inspection team te hi lo kal leh tura beisei an ni a. Medical college dinna tur sum hi central sawrkarin 90:10 pattern-in a tum tur a ni a mahse a thawk-tute hlawh leh a enkawlzuina hi state sawrkar kutah dah a ni ang a. MCI duhdan angin MIMER-ah hian zirlai 100 zir thei tura ruahman a ni a, doctor zirlai zat milin OPD-a inentir theih zat te, khum awm tur zat te, khawl leh hmanrua awm tur te, building awm tur zat te, zirtirtu leh thawktu dang awm tur zat te hi MCI in a bithliah sa leh a duhdan ang thlapa tih a ngai dawn avangin chumi ang chu tlin turin sawrkar chuan chak takin hma a la mek a, medical college-a zirtirtu hnathawk tur hetiang lama thiamna leh experience nei hi Mizo zingah an la tlem hle a, chuvangin a tirah chuan zirtirtu tam zawk chu Mizoram pawna mi chhawr a ngaih hmel thu an sawi bawk.