Mizoram sawrkar Parliamentary Secretary zawng zawng pasarih ten nimin khan Chief Minister Pu Lal Than-hawla hnenah Parliamentary Secretary aṭanga bânna an thehlut.
Bâng ta te hi Pu K S Thanga, Pu H Zothangliana, Lt. Col. ZS Zuala, Pu K Lalrin-thanga, Pu TT Zothansanga, Pu Hmingdailova Khiangte leh Pu Joseph Lalhimpuia te an ni a, an banna lehkhaah chuan nakum State Assembly inthlanpui lo awm turah an party tichak turin hun puma thawh an duh vanga bânna thehlut an nih thu an ziak a ni.
Supreme Court-in thla hmasa ni 27-ah, State sawrkarin Parliamentary Secretary ruat theihna dan a nei lo tia thutlukna a siam avangin, bâng tura phûtna leh nawrna engmah awm lo mah se, dan siamtu an nih avangin ram danpui enkawltu ber Supreme Court thu an zah avangin bânna an thehlut tih an sawi bawk a ni.
Nimin vek khan MPCC President Pu Lal Thanhawla chuan Parliamentary Secretary bâng ta te hi an party Gen. Secretary-ah a dah thar nghal a, nakum Mizoram General Assembly Election-a an Party-in chak zawka hma a lak theih nana dah niin, an party thuchhuah chuan a sawi a, heng Parliamentary Secretary 7 te bakah hian MLA 2 – Pu Lalrinliana Sailo leh Pu Nihar Kanti Chakma te an tel bawk a ni.
——————————————————-