Saitual-ah I-Day hmang lovin Total Bandh huaihawt

Nimin Independence Day kha District khawpui leh block level-ah te pawh hman a ni a, hetihlai hian Saitual-ah chuan, district-a puan phûta sawrkar nawr nan nimin khan he ni hi lawm a ni ve lo a, Total Bandh huaihawt a ni.

Saitual District Implementing Demand Committee (SDIDC)-in Saitual District tihpuitlin ngiata sawrkar an kar meknaah an hun tiam chu kar kalta Inrinni khan a ral tak avangin (SDIDC) huaihawtin nimin zing dar 5 aṭang khan Total Bandh neih a ni a, tlai dar 5 thleng neih tura ruahman nimahse mipuiin an thlawp ṭhat avangin chawhma dar 11:40 khan tihtawp a ni.

Bandh neih chhung hian Saitual Town area – Sihfa, Saitual, Keifang, Rulchawm leh Ruallunga sawrkar building-te leh dawr zawng zawng khâr vek a ni a, khawlaiah lirthei leh mipui veivak an awm lo a, Sai-tual Town paltlang kawngpui – Phullen road, Aizawl road leh Champhai road te dan pin vek a ni bawk. Independence Day function hmanna hmun tur Saitual Public Playground pawh hman theih tura engkim rua-hman ni mah se a ruak vek a ni.

Sawrkarin Independence Day hmanpui tura a ruat Assembly Dy. Speaker Pu R.Lalrinawma chu SDIDC hruaitute leh tualchhunga Ruling Party hruaituten Khuang-thlikawn Petrol Pump-ah lo tidingin, khawchhunga a luh chuan boruak ṭha lo zawk a thlen palh theih avangin khaw chhunga lut loa kir leh mai turin an ngen a, SDIDC ngenna hi ngai pawimawhin Dy. Speaker hian lêt leh mai a hnial loh thu sawiin, SDO (C) Quarters kawt-ah a aiawha Hnam Puanzar lo pawt pharh turin SDO (C) Pu R.Vanlalsawma chu a ruat a, hei hi mipuiin duh loin SDO(C) Quarters kawtah an pung-khawm nghal a, SDIDC hruai-tute chuan helai hmunah pawh hian Flag pawh pharhtir lo mai turin Pu R.Lalrinawma hi an ngen a, Flag hi pawh pharh a ni ta lo a, buaina engmah chhuak loin mipui an tin zui ve a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram