Skip to content
Home » Chanchinthar » Serchhipa Parking Fee khawn dan tur ruahman fel

Serchhipa Parking Fee khawn dan tur ruahman fel

Nimin khan Serchhip District Traffic Management Committee chu an Chairman Pi Sangchhin Chinzah, Serchhip Bawrhsap ni bawk hovin a Office Chamber-ah an ṭhukhawm a, Serchhip-a Parking Fee lâk dan tur an siamfel.

Parking Fee hi kumin September thla laihawl vel aṭangin Serchhip khaw chhung hmun thlan bik 5-ah State Transport Authority ruahmanna angin khawn ṭan turin an rel a, nimina meeting kaihruaitu Pi Sangchhin Chinzah chuan khaw chhung a lo thâwl a, mipuite tana chênna nuam zawk leh him zawk a nih theih nan a chhunga lirthei che vel te mumal taka khuahkhirh a ṭul tih a sawi a, Serchhipa hmun lun laite mumal zawka enkawl a nih theih nan Parking Fee chu khawn a nih tur thu a sawi a ni. Pi Sangchhin Chinzah chuan lirthei neitute chu lirthei an lei dawna a dahna tur Garrage nei vek anga insawia intiamkam an nih angin kawng kama lirthei zanriah ṭhin te pawhin dân an zawm a ṭul tur thu a sawi a, dân zâwm lo lirthei neitute chu an chungah dân anga hmalak zel a nih tur thu leh, mipuiten dân zâwm chunga lirthei enkawl ṭheuh tum turin a chah a ni.

Serchhip khaw chhunga Parking Fee lâkna hmun tura State Transport Authority-in a puan leh rate a bithliah dan chu hetiang hi a ni:

Area 1 DEO Office (AOC) aṭanga PWD (Town Hall) peng inkar chhim lam side zawng.
He Area-ah hian darkar khat leh a hnuai lam (up to one hour)-ah zel Two Wheeler tan Rs.5/-, LMV, Maxi Cab leh Town Bus tan Rs.10/- theuh a ni ang.

 

Area 2 PWD Peng aṭanga Police Beat Post (Town Bus Stand) inkar, chhim lam side zawng.
Hetah hian darkar khat leh a hnuai lam (up to one hour)-ah zel Two Wheeler leh Three Wheeler tan Rs.5/-, LMV tan Rs.10/-

 

Area 3 Beat Post (Traffic Point) aṭanga Tripper Stand inkar zawng.
Hetah hian darkar khat leh a hnuai lam (up to one hour)-ah Two wheeler leh Three wheeler tan Rs.5/, LMV, Maxi Cab, LGV, leh MGV/HGV tan Rs.10/-.

 

Area 4 IOC aṭanga PWD IB Peng inkar.
Hetah hian darkar khat leh a hnuai lam (up to one hour) ah Three Wheeler tan Rs.5/-

 

Area 5 New Serchhip College peng.
Hetah hian darkar khat leh a hnuai lam (up to one hour) ah Three Wheeler tan Rs.5/-

 

Heng rate te hi darkar bia chhiar chhoh sak zel tur a ni dawn a ni.

Three Wheeler leh LMV Public Service, sawrkarin stand a pekte chu an Stand-ah nikhat atan Three Wheeler-in Rs.5/- leh LMV in Rs.10/- an pe ṭhin ang a, hei hi anmahni Stand-a an dinna atan chauh niin, Parking Area danga an dinnaah erawh chuan Parking Fee bithliah dan pangngai angin an chawi ve zel ang.

Lirthei pakhat hi nikhatah a dahna hmun pangngaiah darkar 10 chin bak dah phal a nilova, chutiang aia rei dah ngai, thil ṭul bik a awm chuan thuneitute phalna neih a ngai ṭhin dawn a ni.

Heng Parking Area atana puanna hmuna Collector dil duhte tan dilna hun hawn nghal a ni a, hun tiam chhungin a dil duh apiang tan dil theih a ni.

 

Parking Fee Tender Notice HETAH hian a en theih.

Leave a Reply

This site uses Akismet to reduce spam. Learn how your comment data is processed.