Nimin chawhnu dar 2:30 khan Serchhip District Jail-ah kum tling lo dah an awm leh awm loh enfiahtuten a vawi khatna atan Serchhip Dist Jail an tlawh.
Serchhip District Jail Inspection team te hi an Chairman Pu Lalngaihmawia Zote, Chief Judicial Magistrate Serchhip ni bawk leh Serchhip District Child Protection Officer Nl Lalsiampuii ten an hova, Jail-ah hian tun hnaia ILP Check-a ILP nei lo hnam dang mi dah luh 20 zinga pathum chuan kum 17 niin an insawi a, mahse hei hi finfiahna awm lo a nih avangin anmahni chhawr-tute zawhfiah leh tura tih a ni.
Serchhip District Jail Chhiahtlangah hian hawn a nih aṭanga tâng tam ber ṭum niin, mi tâng 77 an awm a, an zinga 5 chu hmeichhia an ni a, District jail enfiahtute hian Jail ward tin fang kualin, mitâng te chu ngun tak takin a mal malin an en a, kum tling lo nia rinhlelh te chu an kum an zawt nghal zel a. Hnam dang, kum 17 nia inchhal pathum an awm a, an zinga pakhat hi chuan a kum hi a sawi danglam a sawi dang lam nghe nghe a ni.
He inspection team member te lo dawngsawngtu Jail Superintendant Pu Lalbiak-thanga chuan zawhna chhang-in Serchhip District Jail-ah hian harsatna tawh an nei lova, Ei leh in, power supply leh tui supply pawh ṭha takin an dawng mek a, Jail tang te thubuai ngaihtuah tura hruaitu Police ten a hun taka Jail an hruai thlen loh ṭhin avangin tlai lama jail khar fel kawngah harsatna an neih ṭhin thu a sawi.
Serchhip District Jail inspection team hi dan ang taka din niin, thla 4 dan zelah Jail hi enfiah ṭhin tura tih an ni a. Serchhip District Legal Services Authority chuan Jail ah hian dan kawhmuhtu, chawlhkar khata vawi khat hawn ṭhin Legal Aid Services an din a, sawrkar hriatpui ni lem lo, inhriatthiamnaa thawhhona in Pathian thu lama an mahni kaihruaitu tur Evangelical board a awm bawk a, hemi te ruahmanna hnuaiah hian pawn lam aṭanga jail tang te inkhawmpui ṭhin an ni bawk.
Serchhip District Jail tlawhtute hi mi 7 niin, MJA leh YMA Sub Hqrs hruaitu te leh College lecturer te an tel a ni.