US Open: Nadal-a’n Fourth Round a thleng

Top seed Rafael Nadal chuan Argentina player Leonardo Mayer hnehin US Open fourth round a thleng.

Kum 31 mi, Nadal hian set hmasa ber a hloh hnu-ah 6-7 (3-7), 6-3, 6-1, 6-4-in a chak a, Fourth round thlenna atan hian darkar thum leh minute 16 zet hun a hmang a, Last 16-ah hian Alexandr Dolgopolov a hmachahwn leh dawn a, an kaltluang zel a nih chuan Semi-final-ah Roger Federer nen an inhmachhawn thei dawn a, Federer pawh hian Inrinni khan Last 16 hi a lo thleng tawh a, Feliciano Lopez lakah 6-3, 6-3, 7-5-in hnehna a chang a ni.

Sixth seed Dominic Thiem pawhin Straight set – 7-5, 6-3, 6-4-a French world number 34 Adrian Mannarino hnehin Fourth Round a thleng a, Thiem hian kum 4 chhungin Flushing Meadows-ah hian quarterfinal ṭum 3 a thleng tawh a, round lehpekah Juan Martin del Potro a hmachhawn dawn a, Del Potro hian Roberto Bautista Agut chu 6-3, 6-3, 6-4-a hnehin Fourth Round hi a thleng a ni.

Fourth Round-a Nadal hmachhawn tur Dolgopolov hian 6-1, 6-0, 6-4-in Victor Troicki lakah hnehna a chang a, tun ṭum US Open hi kum 28 mi, Dolgopolov-a tan kum 2011-a Australian Open Quarterfinal a thlen hnu-a Grand Slam-a a thlen sân ber ṭum a ni.

Gael Monfils chu a khup ding lam a hliam avangin a hmachhawn Belgian ninth seed David Goffin chuan awlsam takin Fourth round a thleng a, hei hi Goffin-a’n US Open-a Fourth round a thlen vawi khatna a ni a, last 16-ah hian Russian Andrey Rublev a hmachhawn ang.

Hmeichhe lamah World No. 1 Karolina Pliskova pawhin Third Round a paltlang hram a, First set hi Chinese nula Shaui Zhang chuan a la a, second set-ah pawh World No. 26 Zhang hian 5-4-ah match point a nei a, mahse Pliskova hian beidawng duh lova bei zelin a tawpah chuan 3-6, 7-5, 6-4-in hnehna a chang ta zawk a, heti a nih avang hian Elina Svitolina leh Garbine Muguruza te nen World number one dinhmun an la inchuh chho zel thei rih dawn a, Round 4-ah hian Pliskova hian American Jennifer Brady a hmachhawn dawn a ni.

World No. 1 ni thei dinhmuna la ding mek Ukrainian fourth seed Svitolina hian American Shelby Rogers chu 6-4, 7-5-a hnehin Fourth round hi a thleng Spanish third seed Muruguza hian nizan khan Petra Kvitova a hmachhawn a, result kan hre hman ta lo a ni.

French Open champion, 12th seed Jelena Ostapenko pawhin third round paltlang turin World No. 38 Dria Kasatkina lakah 6-3, 6-2-in hnehna a chang a, Lucie Safarova chuan Japanese Kurumi Nara chu 6-3, 6-2-in a hneh bawk a, American Coco Vandeweghe chuan 7-5, 6-4, 6-4-a 10th seed Agnieszka Radwanska hnehin Fourth round a thleng bawk a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram