Law Minister-in Central YMA hruaitu thlan tharte a kâwm

Thawhṭanni khan kum 2019-2021 chhung atana Central YMA Office Bearer thlan tharte chu Law & Judicial Minister, TJ Lalnuntluanga chuan a office chamber-ah lengah sawmin, inkawmhona hun a hmanpui.

TJ Lalnuntluanga chuan Central YMA hruaitu tharte chu Zofate hmasawnna atan leh Zofate inunauna leh inpumkhatna atan an theihna te hmang chhunzawm zel turin duhsakna a hlan a. A Department chan, EF&CC kaihhnawih – Nungcha leh ramngaw, thing leh mau, tuihna humhalhna kawnga Central YMA hmalakna kal mek leh YMA General Conference pawhin hmachhawp a a neih mek chu chak lehzuala kalpui a nih theihna turin YMA te chu thawhhopuiah a sawm a, sawrkar leh tlawmngai pawlte thawhhona ṭha chuan rah duhawm tak a chhuah a beisei thu a sawi lang bawk.

Law & Judicial Minister leh Central YMA hruaitute chuan ram leh hnam hmelma ruihhlo dona kawngah pawh nasa zawka hmalak zel ṭul nia an hriat thute, Zoram ṭhalai ruihhloin a tihbuai mekte chhanchhuak tura theihtawp chhuah ṭul an tih thu leh, hemi kawngah hian YMA-te leh sawrkarin thawhhona ṭha an neih a pawimawhziate an sawiho a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram