Aizawl Municipal Corporation (AMC) chuan Aizawl khawpuia plastic hman khap programme an kalpui mek bawhzuina chikhat, mipui zirtirna nihpahfawmin sikul naupangte tan ‘Plastic Free Rally’ nimin zing khan Aizawlah a buatsaih.
Chanmari leh Sikulpui-kawn aṭangin High School leh Higher Secondary zirlai naupang sang chuangte chuan plastic hman ṭhat lohzia thuziak-te kengin kawng an zawh a, heng hmun hnih aṭanga zirlai kalkhawmte chu Lammualah intawkkhawmin programme an hmang a. Lammuala programme hmanpuitu Chief Secretary Lalnunmawia Chuaungo chuan AMC hmalaknaa plastic, a bik takin vawi khat hmana paih mai chi (single use plastic) lakah beihpui an thlaknate, micron 50 aia pan plastic khapna an kalpui mek leh plastic hlauhawmzia zirtirna an pek mekte chu fakawm tiin he hmalakna phur taka tihlawh-tlingtu AMC Mayor leh Councillor te inpekna chu a chhuan-awm takzet a ni a ti.
Sikul naupangte chu plastic hmang lo tura ngenin plastic-in hriselna a khawih chhiat dante, mihring chenna leh a chhehvel a tihbawlhhlawh dante leh boruak leh tui-ahte nghawng ṭhalo a neih dante chu midang zirtir tura chahin an nitin nunah plastic tel lova khawsak tumin, a hmahruaitu ni turin a fuih a. Naupangte aṭanga plastic hman loh inzirtir chuan hun kal zelah ṭhangthartea awmzia thui tak a neih a beisei tih a sawi a ni.
Lammual a Rally kharna a thusawitu dang AMC Mayor PC Lalhmingthanga chuan Aizawl khawpuia chêngte chu faina leh thianghlima kawng-ahte leh bawlhlawh paih danah te an ṭhangharh mek a ti a, Local Council-te nen ṭangrualin bawlhlawh paih dan ruahman-na kalpui mekah mipui ṭawiawm-na an hmu ṭha tih a sawi a. Aizawl chu Smart City a puan a nih tawh thu sawiin chumi bawhzuina atana plastic a tlem thei ang ber hman leh vawikhat hmana paih mai ang chi (single use plastic), bawlhhlawh siam mai mai te khap chu AMC chuan hnapuiah a nei tih a sawi.
AMC hian 2017 chho aṭangin plastic khap buaipui turin Committee on Plastic Free City a din a. Mizoram pawna khawpui ṭhenkhata te Study Team intirin plastic an khuahkhirh leh khap dante an zir a. Chumi hnua hemi kaihhnawih dan ‘Plastic Waste Management & Handling Rules’ a kalpui ta a ni.