AMFU kum 25 tlin lawmna Deputy CM-in hmanpui

All Mizoram Farmers’ Union (AMFU) kum 25 tlin champhaphak lawmna nimina Aizawla Central YMA Halla neihah Mizoram Deputy Chief Minister Tawnluia leh Agriculture Development Board Vice Chairman H.Biakzaua, Lawngtlai ‘E’ bialtu MLA-ten an hmanpui.

Tawnluia chuan ram hmasawnna bul chu agriculture-ah a innghat thûk em em tih sawiin, ei leh bar, silh leh fen, sum leh paia ram mipuite intodelhna tur khawp hi ram leilungah a awm a ni, a ti a. Mizoram Sawrkar hmalaknapui ber SEDP hmangin Mizoram chu ei leh barah intodelha siam
tum a ni a, chumi hlawhtlin theihna turin AMFU-te an pawimawh hle, a ti a. Leileta siam theih ram chhunga la awmte cheibawlin hlawk zawka buh thar chhuahte, buh seng hnua thlasik thlai chinte, thei leh thlai thar chhuah vawn ṭhat leh sawngbawlte, man man zawka hralh chhuah dan kawng zawnte chu sawrkarin a ngaih pawimawh berte zingah a tel thu sawiin, AMFU-te nen chuan tum thuhmun, Mizo-rama intodelh theih nana ṭan la mek an nih angin thawh-hopuiah Deputy Chief Minister Tawnluia chuan a sawm a ni.

H.Biakzaua, MLA chuan leilungah hausakna awm mahse tlawh pawhna tur kawng a awm loh chuan hlutna a nei lo tih sawiin kawng neih sa chei that piah lamah thlai thar phurhna tur kawng siam belh tul a tih thu a sawi a. Buh leh thlai thar chhuah hralhna tur ngaihtuah leh thlai chin tur thlan fimkhur te chu intodelhna atana kawng pawimawh nia a a hriat thu a sawi.

Nimin inkhawm hi an pawl Sr. Vice President Dr Chawngkhuma Chawngthu kaihhruai-ah an pawl President lo ni tawh Vanlalngaia, Chalngura Jahau leh R.Lalduhawma te hnenah chawimawina thuziak an hlan a. Silver Jubilee Souvenir an buatsaih chu Deputy Chief Minister Tawnluia’n a tlangzarh nghal bawk a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram