Zothlifim Logo
Loading ...

MNF Gen. Hqrs. chuan thuchhuah siamin, Mizoram Pradesh Congress Committee (MPCC) Communication department-ten an thil hriatchian loh vangin Chief Minister chu dân palzut tumah an puh niin an sawi.

MNF chuan an thuchhuahah chuan MPCC Communication Department chuan Inrinni khan thuchhuah siamin, tun hnai mai khan Social Media lamah Chief Minister, Zoramthanga’n PWD Officer-te a kohkhawmnaah tun hnaia RTI Dan hmanga Minister-te lehkha, zirtirtu la tura an duhsak zawng appoint tura an ziahna (official correspondence) chu dan kalh tia a sawi thu leh, langtlang sawrkar kan neih theihna tura India ram dan RTI Act palzut tumna a ni, tiin thu belhchian dawllo hmangin CM chu an puh tih an sawi a, MPCC-ten PWD Officer-te CM-in a koh-khawmnaah tia an sawi chu PWD bik meeting-na pawh ni lovin, November ni 2, 2019-a Chief Minister office-a meeting neihnaah a ni zawk a. Kha meeting-ah khan Planning Board Vice Chairman-te, Adviser to Chief Minister-te, PWD hotute pawh an tel tih an sawi a, CM hova meeting-naah khan official document-te, CM leh Minister-te thil ziak chuanna lehkha, sawrkar department office aṭanga thlalak social media-a lo lang ṭhin chu meeting-a telte chuan an ngaimawh thu an sawi chauh zawk a ni, an ti.

MNF chuan he meeting-a tel ve ṭhenkhatte chuan hetiang titute chu hrem theih an nih thute, chhui chhuah theih vek a nih thute an sawi a, Chief Minister pawhin hetiang laka fimkhur tura inzirtir a ṭul thu a sawina a ni zawk tih tarlangin, khami ṭum khan RTI Act hmanga thu hriat puan darh tih leh zirtirtu lâk lam social media-a lo lang tih phei chu sawi rik a awm lo hrim hrim niin MNF chuan an sawi a, PWD-a lehkha kal social media-a lo lang erawh sawi rik a ni tiin, kha thu kha tuten emaw lo hriain a ni lo zawngin thu an herkual ta mai zawk a ni tih MNF chuan an sawi.