Central YMA hruaitute leh MJA Gen. Hqrs. hruaitute inkâwm

Nimin khan Central YMA hruaitute leh Mizoram Journalists’ Association Gen. Hqrs. hruaitute chu Central YMA President Room, Tuikhuahtlang-ah an inkawm.

Inkawmkhawmna kaihruaitu Central YMA president Vanlalruata chuan CYMA hruaitu inthlang thar hlim hlawt an nih angin inhmel-hriatna leh thawhho zelna atan inkawmkhawm hi huaihawt an ni tih a sawi a. YMA chu a huap a zau a, chhangchhiat changte a awm ṭhin a, thu har deuh neih chang pawh a awm ṭhin a, heng huna chanchinbumi, MJA-te ṭawiawm ṭhinnaah lawmthu a sawi a ni. YMA ram leh hnam tan pawl pawimawh tak a nih rualin, a hruaitute chu mi fing leh fel ber ber an nih loh avangin finchhuah an mamawh tih a sawi a, MJA nen pawh inkawmho zeuh zeuh an duh tih a sawi bawk.

MJA president Zonun-sanga Khiangte chuan YMA-in rei tak chhung ram leh hnam humhalh kumpuan a neih chu hlamchhiah chi a la ni lo chung-in, kumpuan thar – “Zirna Uar” a puang ta chu MJA-te an lawm hle tih a sawi a. All India Service leh Central Service-ah Mizote an lang ve mang ta lo chu rualawh a na a, zirna uar beihpui thlak a ngai hle, a ti a. Mizo ṭhalaite nunpung veiawm, phone leh social media -in a tibuai ta lutuk leh lehkha chhiar an hlamchhiah ta lutuk chu MJA pawhin veiawm a tihzia te sawiin, zirna uar kumpuan chuan lehkha chhiar tam tura inzirtir keng tel se, YMA hmalaknaah pawh tel se a duhawm tih a sawi.

MJA President chuan heng hmalaknaah hian chanchinbumite an ṭangkai ve theihna a awm chuan theihtawp chhuah an inhuam thu te, zirna uar hmalaknaah mipui hnena puanzar tur awmte chu MJA pawhin a tih turah a ngai, tiin, zirna ngawr ngawr piahlamah aia upa zah leh nundan mawi hrim hrim inhrilhhriat te chu YMA kumpuan hian a keng tel turah an ngai tiha sawi bawk a ni.

Inkawmkhawmnaah hian Zohnahthlak inpumkhatna chungchang te, Chakma leh Bru chungchang leh thu pawimawh dangte sawi ho niin, hmalaknaa sawifiah ngaite an inhrilhfiah a ni.

RELATED ARTICLES
November 11, 2019
November 8, 2019
November 8, 2019
November 6, 2019
November 6, 2019

Leave a Reply

This site uses Akismet to reduce spam. Learn how your comment data is processed.