Chief Minister Zoram-thanga chuan nimin khan Hnahthial District Headquarters-a DC office leh sawrkar office dangte awmna tur hmunhma a enfiah a. Health Minister Dr. R. Lalthangliana, Hnahthial Bialtu MLA bakah Lunglei High Powered Committee Vice Chairman Lawm-awma Tochhawng leh TC Pachhunga, Sports & Tourism Board Vice Chairman ten Chief Minister hi an ṭawiawm a ni.
Hnahthial DC buatsaih vantlang inkhawmah Zoram-thanga chuan district inrel-bawlna changtlung zawk din a nih theih nan DC office leh sawrkar department dang office awmna tur ruahman a, hmasawnna ruangam siampui tura kal an nih thu a sawi a. Mizoram sawrkar hmalakna hrang hrang sawiin, Chief Minister chuan kawng siam hna thawh mek a nih thu te, zirtirtu ṭhahnem tak hun reilote chhunga lak an nih thute, chhungtin damlo inenkawlna kum khatah cheng nuai hnih chin sawrkarin a peksak theihna tur health care scheme siam a nih thute leh Mizoram sawrkar flagship programme SEDP-ah board hrang hrang dinfel a nih thu a sawi a. Ei leh bara intodelhna tur leh chhungkaw tin sum lâkluh a lo pun theih nan SEDP kaltlanga hmalak a nih tur thu leh a hlawhtlinna tur chuan Zoramin malsawmna a dawn, a chhunga chengte chawm zo thei ram zau tak, engkim that duhna hmun, ruahtui tamna kan neih hi hman tangkai thiam a pawimawh a ni, a ti.
Health Minister Dr. R. Lalthangliana chuan district thar atan District Master Plan duan a nih tawh thu sawiin hmasawnna tam tak a awm chho zel dawn, a ti a. Inkalpawh-na kawng tha zawk buatsaih tura hmalak mek a nih thu te, JNV school leh Ayush Hospital neih theih beisei a nih thu te, district thar pathumah hospital changtlung tak, thawktu tam zawk leh khawl tha te awm tura ruahman a nih thu a sawi. Hnahthial district vanneihna tak, luia hausakna a neih hman tangkai a nih tur thu Minister hian a sawi a. Hnahthial District-ah Power supply mamawh-na a san avangin an mamawh-na phuhru turin hmalak mek a nih thu a sawi bawk.
He hunah hian Hnahthial Town VC Association-ten CM Relief Fund a chhunluh turin 10,000/- Chief Minister hnen-ah hlanin, MLA Relief Fund atan Health Minister hnenah10,000/- an hlan bawk.
Chief Minister hian Hnahthial KVK, ITC, BDO, Hospital leh DC office te tlawhin, hmalak belhna tur te a enpui a, Rawpuiah khawtlang mipui kawmna hun a hmang bawk a ni.